Dungtlangah Vangpui Kût hmang

Dungtlang Branch YMA chuan Dungtlang Zokhuaah Vangpui Kût vawi 36-na an hmang a, nimin khan Champhai district bawrhsap James Lalrinchhana'n hmanpuiin, Vangpui Kût Cultural Day a hawng.

Dungtlang Vangpui Kût lawmna péng pakhat Cultural Day hi Dungtlang YMA vice president Lalhmuakmawia Khiangte-in a kaihruai a; khuallian James Lalrinchhana bakah, kût thlengtu VC president Malsawmthanga, Tuipuiral Group YMA vice president C Lalpekthanga leh Dungtlang Branch YMA president Deny Lalremruata ten thu an sawi.

Vangpui Kût hi September 26 khan hman ṭan a ni a, naktukah khâr a ni ang. Kût chhungin Mizo infiamna chi hrang hrang hmangin intihsiak a ni a, hmasawnna lam inkawhhmuhna, infiamna leh hnam ziarâng tarlang theite tarlan a ni bawk.