DMR Minister-in khawchhaka lirnghing tuarte a tlawh lo hi a mak - Ngunlianchunga

Congress party MLA C Ngunlianchunga chuan, Mizoram khawchhak lama lirnghing tuarte tun thleng­a Disaster Managemenrt & Rehabilitation (DMR) minister Lalchamliana'n a la tlawh lo leh Tourism minister Robert Romawia Royte-in Zokhawthar Tourist Lodge, lirnghing vanga luah ngam loha awm mek a la tlawh lo chu mak a tih thu a sawi.

C Ngunlianchunga hian tun hnai khan Cong­ress MLA dangte nen khaw­chhak lama lir­nghing tuarte an tlawh kualnaah Zokhawthar Tourist Lodge tlawhin thu a sawi a, "Tourism Minister-in Zokhawthar Tourist Lodge a tlawh lo hi a mak ka ti a, DMR Minister-in tun thlenga lirnghing tuartute a la tlawh lo hi a mak leh zual," a ti.

Tourism minister Robert Romawia'n tun hnaiah lirnghìnna hmun khawchhak tlangdung khaw hrang hrang tlawh mah se, a department chan Tourism hnuaia Zokhawthar Tourist Lodge a tlawh lo chu mak a tih thu a sawi a; Tourist Lodge chu luah ngam loh khawpin building bang, beam leh a bante hmun tam takah a khi nasa hle tih a sawi a ni.

DMR minister hlui C Ngunlianchunga chuan, DMR minister-in lir­nghingah thil tih theih bik nei lo mah se, chhiat­na lian tham a thlenin a hmunah a rang thei ang bera thlen chu an mawhphurhna a nih thu a sawi a, "Sorkar aṭanga 

ṭanpui­na awm theite rang taka ngaihtuahpui a, a ṭul ­apiang ngaihtuah hian thlabár taka awm chhiatna tâwkte an thlamuan phah ve ṭhin a ni," a ti a; DMR minister Lalchamliana chu che chhuak thuai turin a phût tih a sawi.