Mizoramah Covid-19 SOP ṭhiah a ni

Covid-19 hripui léng avanga kum 2020 aṭanga mipui nunphung atan kaihhruaina leh khuahkhirhna siam ṭhin, Covid-19 Standard Operating Procedure (SOP) chu ṭhiah a ni a; ṭhiah a nih chhan chu hripui léng a lo ziaawm tak vang a ni.

Covid-19 SOP ṭhiah chung-changah hian State Disaster Management Authority-a State Executive Committee chairman Dr Renu Sharma chuan September 27, 2022 khan hriattirna a tichhuak a; Disaster Management Act tlawhchhana Covid-19 SOP hman ṭhin chu ṭhiah a nih thu a puang.

Hetih lai hian, Health & Family Welfare department-in Covid-19 dona atana thuràwn a tihchhuah - hmai tuam leh kut silfai ṭhatte chu kalpui zui zel tur a nih thu sorkar thuchhuahin a tarlang.

India ramah Covid-19 positive zat a tlakhniam avang leh hripui hmachhawnnaah sorkarin inbuatsaihna ṭha tâwk a neih tawh avangin March 22, 2022 khan National Disaster Management Authority chuan DM Act hmanga SOP sûtna thupek a lo tichhuak tawh a; Ministry of Home Affairs pawhin February 25, 2022 hnuah SOP thar a tichhuak tawh lo.

Sorkar laipui hmalakna angin Mizoram SDMA pawhin Mizoramah Covid-19 léng a ziaawm tawh avangin DM Act hmanga inkhuahkhirhna thupek tihchhuah ṭhin chu a sût ta a ni.