Sazu hrài rûnpui buatsaih a ni

Serchhip Zawlpui zauah nimin khan Agriculture department bultumin loneitute'n túra sazu hrài rûnpui an buatsaih. Tunlai hian Mizoram hmun hrang hranga buhte sazuin a bei mek a, rawnàl tám avangin sazu a puang nia ngaih a ni.

Serchhip district khaw ṭhenkhata tlang ram buhte seng tur awm lo khawpin sazuin an ei a, Serchhip Zawlpui zau leileta thar-rang buhte pawh sazuin an beih ve leh avangin buh chhan theih beiseiin sazu hrai rûnpui neiin hun an hmang a ni. Sazu túr chi hnih Zinc Phosphite (a dum dip/phut) leh Roban (cake)-te hman a ni.

Serchhip Zawlpui zaua Field Management Committee (FMC) hruaitute chuan, kum dangah sazu vanga harsatna an la tawh ngai loh thu an sawi.

Zauah hian chhungkaw 68 chuangin buh hmun an siam a, kum tin buh phur 7,000 chuang an thar ṭhin.