KHAWTHLIR

NSS-in thisen pe
Nimin khan Pachhunga University College NSS chuan an campus-ah Civil Hospital, Aizawl tan thisen unit 64 an pe a, thisen petute mipa 44 leh hmeichhia 20 niin, department pariata third semester zirlaite an ni. Lawngtlai College NSS pawhin nimin khan Lawngtlai District Hospital tan thisen unit 41 an pe a, petute mipa 35 leh hmeichhia paruk an ni.

HSSLC exam hun
Mizoram Board of School Education chuan nakkum February/March thla khian Higher Secondary School Leaving Certificate Examinations, 2023 a buatsaih dawn a; HSS principal-te tan October 6, 2022 aṭangin examination application form lak theih a nih dawn thu a tarlang. Exam form thehluh hun hnuhnung chu November 18, 2022 a ni a, late fee chawiin November 25, 2022 thleng thehluh theih a ni.

END-in heroin man
Excise & Narcotics department chuan nimin chhun dar 12:40 khan Champhai district-a Mualkawi khaw dáiah heroin gram 574 (hawng 44) leh a neitua puh Lallawmkima (31) s/o Abrahama leh Goldena (28) s/o Thiamsanga, Zokhawthar ve ve nia inchhalte an man. Heroin phurhna atana an hman Maruti Ignis car an hrênsak bawk.

E-Roll aṭangin Bru paih zel
Tripura refugee camp-a awm Bru, Mizoram electoral roll-a hming chuangte chu Election Commission of India thu angin Mizoram electoral roll aṭanga paih zel a ni a, September 26, 2022 thleng khan mi 1,594 paih an ni tawh. Mi 1,594-te chu Hachhek, Dampa, Mamit, Tuirial, Kolasib, Serlui, Thorang leh West Tuipui biala vote neite an ni.

Samagra training
Champhai Block Resource Centre chuan nimin khan Samagra Shiksha hnuaia School Management Committee leh School Management & Development Committee member-te tan orientation training an buatsaih. He hunah committee member-te chu an mawhphurhna leh tih turte hrilhfiah an ni.