MR atan family declaration tih thar a ni ; MR bill-a sum sen a tlem phah beisei

Sorkar hnathawkte'n anmahni leh an chhungte damloha an inelkawlna senso sorkar aṭanga an hmuh letna, medical reimbursement (MR) bill dan turah Sub-Committee on MR rawtna angin, family declaration tihdanglam a ni a, tunlai hian sorkar hnathawkte'n family declaration thar an thehlut mek. Committee chuan family declaration tih thar hian MR bill-a sorkar sum sên a tihtlem beisei a ni.

Sub-Committee on MR-ah hian member pali an awm a, Health Secretary-in kaihruaiin, MR bill dan tura an rawtnate chu sorkarah an thehlut a ni. Committee chuan, a hmaa sorkar hnathawkte MR bill-naa 'family' tih chu dik lo taka hman a ni ṭhinah ngaiin, a thara tih an rawt a, CS (MA) Rules ang taka kalpui a nih chuan damdawia inenkawlna atana sorkarin sum sen a tlem phah turah an ngai.

Finance department-in RTI Act hmanga zawhna a chhan danin, Sub-Committee on MR rawtna anga sorkar hnathawkte family declaration siam danglamah chuan, sorkar hnathawkin an fate kum 25 thleng tan MR an bill sak thei dawn.

Sorkar hnathawk fate zingah hmeichhia pasal nei lo leh sum lak luhna nei lote chu dam chhungin MR bill sak theih a ni dawn thung a; sum lak luh an nei lo tih tihchianna tur chu DC office aṭangin lak theih a ni ang a, pasal nei lo tihchianna chu Marriage Registrar aṭangin certificate lak tur a ni.

Dân anga fa lâkteah chuan Magistrate aṭangin legal adoption certificate neih tur a ni a; fa lâkin a latu nu leh pa a telh dawn chuan Magistrate aṭangin legal adoption certificate a awm tur a ni bawk.

CS (MA) Rules ang taka kalpui a nih chuan, medical treatment atana sum sên a tlem phah turah ngaih a ni a; chhungkaw member, family declaration-a telhte chuan identity proof atan birth certificate, EPIC, Aadhaar, driving license zinga a eng emaw ber leh sorkar hnathawk, declaration nena an inlaichinna tarlang thei tur a awm tur a ni.

Sorkar chuan Sub-Committee rawtna angin August 14, 2017-ah family decalration thar siam turin hriattirna a chhuah a, fuh tawk lo a awm avangin siam ṭhat leh niin, September 4 khan sorkar chuan hriattirna kimchang zawk a ti chhuak. Declaration chu September 2017 chhungin thehluh tur a ni a, tunah hian sorkarin ngawrh takin a buaipui mek.