Rural Bank din champha vawi 35-na

Vawiin hi Mizoram Rural Bank (MRB) din champha vawi 35-na a ni a, Mizoram hmun hrang hranga MRB branch-te chuan an lawm dawn. MRB hian branch 84 neiin, thawktu 341 an awm mek.

MRB kum 35 tlin lawm nan hian MRB branch hrang hrangte chuan vawiin hian an customer-te tan luan chhuah hun hman an tum a, Treasury Qsuare-a MRB chuan MJA member-te nen Aizawl Press Club-ah zanriah kilho an tum a ni.

MRB thuchhuah chuan, MRB hi Septem­ber 27, 1983-ah Regio­nal Rural Bank Act tlawhchhana din a ni a, din a nih theih nan din a nih laia chief minister Ch. Chhunga'n a thawh hlawk hle tih an tarlang a, "Core Banking Solution hi February 2011-a hmang ṭan chauh kan ni chungin, Mizoram sorkar leh Mizo mipuite min duhsakna azarah bank hmasawn chak tak kan lo ni ve ta," an ti a; New Secretariat Complex-ah head office tur an sak mek thu an tarlang.

MRB tarlan danin, MRB hi Mizoram sorkar hnuaia pension tawh leh pension thar turte'n an pension hlawh lak nan an hmang thei tawh a, pension hlawh late tan MRB Pension Loan Scheme hnuaiah Pension Loan leh Family Pension loan lak theih a ni.

MRB hian ATM an nei tawh a, NEFT leh RTGS transaction bank danga pawisa thawnte leh insurance chi hrang hrang - SBI Life Insurance, SBI General Insurance, APY, GPAI, PMSBY, PMJJBY-te chu an customer-te an tihsak thei bawk.

MRB hian March 31, 2017 thleng khan branch 84 neiin, thawktu 341 an awm a; sum dah luh zat chu cheng vbc. 1824 niin, a dah luttu zat chu mi 7,39,716 an ni. Loans & advances atan mi 58,437 hnenah cheng vbc. 954 an pe a, an hlêp zat chu cheng vbc. 30.41 a ni.