Kawng chhia vangin tlân lo
Lunglei leh Tlabung inkar kawng, National Highway no. 302 chu a chhiat avangin a zawh ṭhintu maxicab-te chu Tlabung Maxicab Drivers' Welfare thurel angin, September 25, Thawhṭanni aṭang khan an tlan duh rih lo a, niminah pawh an la tlan duh lo.
Tlabung aṭanga thu dawn danin, maxicab neitu leh enkawltute chuan Lunglei-Tlabung kawngpui NH-302 chu lirthei tlânna chi-a an ngaih loh avangin, kawngpui thawm ṭhat a nih hma chuan tlan rih lo an rel a; Thawhṭanni aṭang khan Tlabung leh khaw hrang hranga tlan maxicab 30 chuang chu an tlan duh lo a ni.
Tlabung Maxicab Drivers' Welfare hruaitute chuan, maxicab an tlantir loh hnuah nimin thleng khan sorkar aṭangin mumal taka dàwrtu an awm rih loh thu leh, vawiinah pawh tlan loh an tum thu an sawi a; lungawi loh vanga ding an nih loh thu leh, kawng chhe zual laite lirthei tlan theih tur khawpa thawm ṭhat a nih hma chuan tlan an tum loh thu an sawi bawk.
Kawng chhia vanga maxicab tlân lo zingah hian Tlabung leh Lunglei inkara tlân maxicab-te bakah, Tlabung aṭanga Aizawl, Silchar leh Tuichawng pan ṭhin maxicab-te pawh an tel a ni.