MNF-in CBI chhuitir turin CM an ngen nawn

MNF party mi ṭhen­khat chu nimin khan chief minister Lal Thanhawla chu a pisaah an hmu a, Mizo Carbon leh lottery chungchang Central Bureau of Investigation (CBI) chhuitir turin an ngen nawn leh a; Mizo Carbon leh lottery chungchang chauh ni loin, MNF-in sorkarna a chan ṭan tirh, kum 1987 aṭanga chhuitir turin an ngen nghal.

MNF-in nimina Chief Minister hnena lehkha an thehluhah chuan, Mizo Carbon leh Mizoram state lottery-a thil dik lo awmte chhui turin CM-in CBI koh luh a inhuam thu a lo sawi tawh angin, CBI chhuitir turin an ngen nawn leh a; CBI koh luh phalna lehkha a lo siam tawh a sût lehnaa chhuanlam a siam tawhte chu ukilte'n chhuanlam tling a ni loa an sawi avangin, Mizo Carbon leh lottery-a thil dik lo awm nia langte chu CBI chhuitir turin an ngen a ni.

MNF chuan, Sep­tember 22, 2017-a Congress Bhavan-a CM Lal Thanhawla'n thu a sawinaah, 'MNF sorkar lai kum 1999 aṭanga thil dik lote MNF-in chhui vek an ngam chuan CBI kan chhuitir ang' tia a sawi chu lawmawm an tih thu sawiin, "MNF chuan 1999 aṭang chauh ni loin, Pu Laldenga hoa sorkar ṭanna 1987 aṭanga chhui vek pawh kan ngamin kan remti em em mai," an ti. CM chu kum 1987 aṭanga thil dik lote CBI chhuitir turin an ngen nghal bawk.

MNF hian lehkha hi an general secretary C Lalrammawia hmingin an thehlut a, lehkha thehluhnaah MNF party mi eng emaw zat an kal a ni.