State Referral Hospital-ah Tobacco Cessation Clinic

State Referral Hos­pital, Falkawna Tobacco Cessation Clinic din thar chu nimin khan Indian Society on Tobacco and Health (ISTH), Mizoram Chapter president Lal Riliani'n a hawng. Taba­cco Cessation Clinic hi vaihlo zûk leh hmuam nghei tumte enkawlna tur a ni.

Lal Riliani chuan, sorkar ropui zawk leh mi fing zawkte'n vaihlo a hrisel lo a, mihring tan a ṭha lo a ni tih an hriat chian avangin ruihhlo chi khat ang hialin vaihlo an do mek tih sawiin, "WHO pawhin a buaipui mek a, kan ramah pawh nasa takin kan buaipui a. Ram danga an neih ve loh tuibûr thlengin kan ramah chuan buaipui a ngai a, thawh tur a tam a, hmalakna tur a tam hle a ni," a ti.

Mizoram State Toba­cco Control Society-a nodal officer Dr Jane R Ralte-in report a pek danin, Mizoramah chuan Tobacco Cessation Clinic hi Aizawl Civil Hospital, Lunglei Civil Hospital, Champhai District Hos­pital, Serchhip District Hospital (JN Hospital), Siaha District Hospital, Lawngtlai District Hos­pital, Kolasib District Hospital, Mamit District Hospital leh Mizoram State Cancer Intitute, Zemabawkahte a awm tawh a; State Referral Hospital-a hawn hi 10-na a ni. Chhinga Veng Presbyterian Kohhran nen ṭang duna din Satellite Clinic pakhat a awm bawk.

Tobacco Cessation Clinic-te hi June 2009 aṭanga August 2017 thleng khan vaihlo leh a kaihnawih sim tum mi 16,401-in an pan a, a patu zinga 22.1% chuan zuk leh hmuam an sim tawh a ni.