Sorkar hrilh loa haw mi 150 chuang enfiah leh khung hran vek an ni

Hmarchhak state palia Mizoram mi tangkhangte Mizoram sorkar ruahmanna anga April 30 - May 2 inkara hruai hawnaah, sorkar official-te hriattir loa mahni thua haw mi 150 chuangte chu anmahni thua haw ni mah se, ramria screening point-ah enfiah vek an ni a, quarantine centre-ah khung hran vek an nih thu Home department hotute chuan an sawi.

Vanglaini palai zawhna chhánga Home department-a deputy secretary David H Lalthangliana'n a sawi danin, Mizoram sorkarin inhriattirna tur a tiha inhriattir loa mahni thua hawte chu Silchar lama awmte an ni a; Home department leh Disaster Management & Rehabilitation department-in inhriattirna tura an tihah inhriattir loin, task group pakhatah an lo inhriattir ve a ni.

Sorkar lam aiawhte hriattir hmasa lo mah se, Mizorama an haw hmain an haw dawn tih Home department lamin an hria tih sawiin, David H Lalthangliana chuan, "Arrangement engkim kan siam fel leh vek tho a, harsatna a awm lo. Thil ṭulte kan hrilh leh hman vek a, an quarantine-na tur zawng zawng pawh kan ti fel vek a ni," a ti.

Home Deputy Secretary chuan, inhriattir hmasa loa haw mi 150 chuangte chu Silchar Mizoram House-a DRC-in ruahmanna a siampui leh hman vek tih sawiin, "Anmahni pawh Mizoram ramria screening point-ah enfiah vek an ni a, quarantine vek an ni. An hawna tur district pawh kan hre vek a. Anmahni kan hre lo a ni lo a, an hawna turte leh an awmnate kan hre lo tihna a ni lo," a ti a; quarantine centre-a an luhna tur leh an awm zel dan turah pawh sorkarin ruahmanna a siam vek thu a sawi. 

David H Lalthangliana chuan, Home department-in sorkar aiawhtea inhriat­tir loa mahni thua haw mi 150 chuang an awm thu a puan chhuah chu, tun hnuah Mizoram sorkar ruahmanna ang loa mahni thua awm tawh lo tura mi an hriattir duhna rilru zawk a nih thu a sawi a, "Kan tih chhan ber chu, a rawn haw leh turte chu DRC-te leh YMA President-te'n an arrange pui loh chuan mahni thuin rawn haw tawh lo se kan tihna a ni," a ti.

Home department thuchhuah chuan, hmar­chhak state-ah Mizoram mi tangkhang an la awm tih hriat a nih avangin, haw leh turte chu mahni duhthua haw mai lo turin a hriattir a; an tangkhanna state-a Mizoram House-a deputy resident commissioner-te emaw, YMA president-te emaw hnenah inhriattir hmasa turin a chah a ni. DRC leh YMA awm lohna state-a mite tan email covidstrandedmz@gmail.com ah inhriattir theih a ni bawk.

Inhriattirnaah hian hming, kum, pa hming, Mizorama address, tang­khanna state leh khua, tang­khan chhan, EPIC/Aadhaar number, phone number, motor neih leh neih loh, mahnia hawna tur inngaihtuah theih leh theih lohte tarlan tur a ni.