Pianphunga rualbanlote'n mi dang ruala Ke an pên ve theihna tur sawiho a ni

Pianphunga rualbanlote'n mi dangte ruala ke an pên ve theih nan leh awlsam zawka nun an hman theihna atana ṭan lakna tur, Accessible India Campaign chungchang chu nimin khan Social Welfare secretary P Lalchhuanga hoin Secretariat conference hall-ah sawiho a ni.

Meeting-a tarlan danin, Accessible India Campaign hi hlawm (phase) thumah ṭhen a ni a; Phase-I chu sorkar building 37-ah rualbanlote awlsam zawka an kal theih nan building siamṭhatna tura ṭan lak a ni. Hemi atan hian ruahmanna hrang hrang siam a ni a; chungte chu - lift, toilet, sloped ramp leh handrails (vawnbán) siamte a ni.

Nikum khan sorkar building 37-ah empanelled firm, Sishu Sarothi (Guwahati) chuan accessibility audit an lo nei tawh a; Phase-I atan cheng nuai 600 chuang dah a ni. Phase-II hnuaiah sorkar building 50 chuang siamṭhatna tura duan a ni a; Phase-III chu Aizawl, Lunglei, Champhai, Kolasib, Mamit, Siaha, Lawngtlai, Serchhip, Saitual, Khawzawl, Hnahthial-ahte kalpui a ni ang.

Accessible India Campaign hi December 3, 2015 khan kalpui ṭan a ni a; a tum ber chu - pianphunga rualbanlote'n mi dangte ruala ke an pên ve theih nan leh awlsam zawka nun an hman theihna atana ṭan lak a ni.

Campaign tihlawhtling tur hian kawng hrang hrangah ruahmanna siam a ni a; a huam­te chu - sorkar leh mimal pisaah rualbanlote awlsam zawka an kal theihna tur te, lirthei (bus, etc.) harsatna nei loa an hman theih nan leh, information and communication system an hman ve theihna turte a ni.

Nimina meeting-ah hian Social Welfare, Taxation, Excise & Narcotics, Mizoram Board of School Education, Power & Electricity, PHE, IPR, Horticulture, LAD, Transport, Land Revenue & Settlement, Art & Culture leh Tourism department te, Science & Technology, Institute of Advance Studies in Education, Mizo Higher Secondary School, Pachhunga University College, T Romana College leh Aizawl Civil Hospital hotute an tel a ni.