Children’s Science Congress neih a ni

RMSA leh Science Teacher Association of Mizoram (STAM) chuan, nimin khan MBSE conference hall-ah district level Children’s Science Congress vawi 25-na an buatsaih ṭan a; thupui chu, 'Science, Technology and Innovation for Sustainable Development' tih a ni a, vawiinah chhunzawm a ni ang.

Children’s Science Congress hawngtu, Aizawl district RMSA DPC Zohmingthanga chuan, Children’s Science Congress chu zirlaite'n science subject-a tuina an neih belh nan leh hmasawnna an neih zel theihna atana buatsaih ṭhin a nih thu a sawi a; Science Congress-a tel zirlaite chu ṭha taka ti turin duhsakna a hlan.

Children’s Science Congress hi category pa­hnih - junior level (kum 10-14) leh senior level (kum 15-17)-ah ṭhen a ni a; sikul pakua aṭangin team 26 an tel. Nimin khan project 16 entir a ni a, vawiinah project 10 entir leh a ni ang.

Nimin vek khan Serchhip P&E YMA Hall-ah Serchhip district Children Science Congress buatsaih a ni bawk a; sikul pali aṭangin team pakua telin, zirlaite'n an science project-te entirin an intihsiak a ni.

District hrang hrang­a district level Science Congress neih meka category tina ti ṭhate chu October 5-6, 2017 chhunga state level Children’s Science Congress-ah an tel dawn a; state level-a ti ṭhate chu December 2017-a National Children’s Science Congress-ah Mizoram aiawhin an tel ang a, Mizoram aṭangin mi pariat an kal thei dawn a ni. State level-a inelnaa ti ṭhate aṭangin Indian Science Congress-a Mizoram aiawh tur mi pa­hnih thlan a ni bawk ang.