Parking fee khawn dan thlir lêtna nei
Serchhip District Traffic Management Committee chu nimin khan an chairman Sangchhin Chinzah, district bawrhsap hoin a pisaah an ṭhukhawm a; tun hnaia Serchhip khawpuia hmun thlan bika motor parking fee khawn ṭan kalpui dan an thlir let.
Serchhip DC chuan, Serchhip khawpui chhung bikah State Transport Authority (STA) ruahman angin, a ṭum khat nan parking fee khawn ṭan a nih thu a sawi a, "Lirthei neitute leh thuneitute tan ngei pawh thil tih fuh tâwk loh te, siam rem hlek ngai thilte awm thei a nih avangin ni 10 hnu velah thlir letna hun buatsaih a ni," a ti.
Meeting hian, auto-rickshaw neitute leh pick-up neitute'n an harsatna an thlente an ngaihtuah a; an harsatnate chu parking fee collector leh anmahni inkara chinfel mai theih nia a lan avangin District Transport Officer kaihhruaina hnuaiah lo inbia se, an ti.
Parking fee pumpelh duh vanga khawpui chhung kawngkam ṭhenkhata lirthei dahtute chungchang ngaihtuah a nih bakah, Serchhip District Hospital area-a no parking area khauh zawka kenkawh dan tur te, a hungna siam dan tur te, road marking thar zawk a ṭulna hmuna siam dan turte leh, parking fee collector retender ṭul pakhat la awm mek bawhzui dan turte pawh an sawiho nghal a ni.