KHAWTHLIR

Thisen pe
Aibawk Bial KṬP chuan nimin khan Synod Hospital tan thisen unit 25 an pe a, a petute mipa 21 leh hmeichhia pali an ni. Rulchawm Branch YMA chuan September 25, 2017 khan Aizawl Civil Hospital tan thisen unit 70 an pe a, a petute mipa 58 leh hmeichhia 12 an ni. September 25 vek khan Model Youth Association (MYA) pawhin New Siaha-a MYA Multipurpose Hall-ah Blood Donation cum Awareness Campaign an nei a, mipa 18 leh hmeichhia 18-te'n thisen unit 36 an pe nghal.

Mahila lawm
Congress party-a hmeichhe pawl, Mahila Congress chuan thuchhuah siamin, minister of state atana Vanlalawmpuii Chawngthu, September 22, 2017-a lak luh a ni chu lawmawm an tih thu an tarlang a, "Pu Lal Thanhawla kaihhruai Congress sorkarin hmeichhiate min hnuaichhiah loin, min chawikâng zawk a ni tih a entir avangin lawmthu kan sawi a ni," an ti.

SVEEP training
Special Summary Revision of Electoral Rolls, 2018 kalpui mekah, SVEEP nodal officer-te leh campus ambassador-te tan nimin khan Aizawl DC conference hall-ah training buatsaih a ni.

Tanpuina hlan
Tahan, Myanmar-a pawl pakhat, Zawlbuk pawl chuan kumina Mizorama tuilian leh leimin tuartute ṭanpuina turin September 25 khan Central YMA hnenah Rs. 1,38,615 an hlan.

ZORO-in kâwm
ZORO general headquarters hruaitute chuan September 25, Thawhṭanni khan Kolasib College zirlaite an kâwm a, ZORO hmalakna leh thil tumte an sawipui.

Lui humhalh
Lengpui YMA chuan luia nungchate an inthlah pun ṭhat theih zawk beiseiin, October 1 leh November 15 inkar hian an ram chhunga lui - Lunghmul leh Lengpui luiah tumah kal lo turin an ngen a, sangha fuan ven an khap bawk. Lengpui Model YMA pawhin Sairilzo-Chiahpui luiah lui kal an khap a, Dialdawk lui leh a pengah sangha fuan ven an khap bawk.