MPSC-in staff nurse tur a lakte hnâwl a nih chhan Assembly-a pharh a ngai

Sorkarin Assembly-ah a la pharh lo?

Mizoram Public Service Commission (MPSC) hotute chuan, MPSC-in kum 2016-a Mizoram sorkara thawk tur staff nurse 25 a lak (recommend), Mizoram sorkarin a hnâwl chungchang chu dan ang chuan, state legislature-ah pharh tur a nih laiin, tun thlengin sorkarin a pharh âwm an la hriat loh thu an sawi.

MPSC chairman PC Lawmkunga, IAS (Rtd.) leh MPSC member Rev. Zosangliana Colney te chuan nimin khan MPSC chairman pisaah thuthar thehdarhtute an kâwm a, MPSC kalphung tlangpui an sawi a ni.

PC Lawmkunga sawi danin, danin a sawi angin, public service commission (Mizoramah chuan MPSC)-in sorkara thawk tur a lak (recommend)-te chu sorkarin a pawm lo thei a, a pawm lo a nih chuan, a pawm loh chhan chiang taka ziah tur niin, chu chu parliament/state legislature-ah pharh tur a ni.

MPSC recommendation chu sorkarin a pawm lo a nih pawhin, a vaiin a pawm lo tur a ni a; sorkarin a pawm loh vanga Court case a awm a nih chuan, Court hmaah sawifiah tur a ni bawk.

Kum 2016-a MPSC-in staff nurse atana mi 25 a lakte Mizoram sorkarin a pawm loh chungchanga zawhna chhangin MPSC hotute chuan, "An pawm loh hnuah Assembly sitting vawi thum a awm tawh a, tun thlengin legislature-ah hian an pharh kan la hre lo," an ti a; staff nurse atana thlante chu Court-ah an zualko thu an sawi.

Staff nurse tur mi 25 MPSC-in a lakte sorkarin a pawm loh chhan bera an ziah chu, declaration form-a hming ziah loh vang a nih thu sawiin MPSC hotute chuan, "Declaration form a awm a, chutah chuan 'Candidate zingah kan laináte an tel lo' tih hming sign hnan tur a awm a, mahse, hei hi tun hma aṭangin kan lo sign ngai lo. Declaration-ah hian 'Kan lainate an tel e,' tiha hming ziah hnan tur erawh a awm lo," a ti a; declaration-a hming ziah tur chungchang chu ennawna siamṭhat mek a nih thu an sawi.

PC Lawmkunga chuan, hna laknaa personal interview-ah subject expert an tel ngei ṭhin thu a sawi rualin, MPSC chairman emaw, member emaw a/an awm ngei ngei tur a ni tih danah a awm loh thu a sawi a, "Interview board-ah member an kim lo tih vangin Commission recommendation hnâwl ngawt theih a ni lo," a ti.

MPSC-in exam a buatsaihah application form man to lutuk chungchanga zawhna chhangin MPSC hotute chuan, Finance department lamin revenue hmuh tihpun tum ve tura an tih vang a nih thu an sawi a; revenue an hmuh vete chu MPSC-in a duh angin a hmang mai thei lo a, sorkar sum báwma chhùn luh vek a ngaih thu an sawi.

MPSC hotute chuan, "Sorkara revenue chhûng lût tam viau tur kan nih loh rualin, Finance lamin revenue target min siam ve a, chu chu kan tlin lo ṭhin. Revenue target min siamsak hi tlin turin min beisei a, application form man tisang tura min tih vanga tisang kan ni," an ti.

MPSC hotute sawi danin, financial year 2017-18 chhung atan Finance lamin MPSC chu revenue target cheng nuai 26 an tuksak a; cheng nuai 26 chu tunah hian Rs. 20,16,693 (Nuai 20 chuang)-in an khûm tawh. Kumina sum an hmuh a tam tâk chhan chu, exam application form man tihsan a nih vang leh kuminah (tunlaiin) sorkar hna exam buatsaih tur an ngah vang a nih thu an sawi.

PC Lawmkunga chuan, MPSC chairman leh member term chu pawhsei theih a nih loh thu te, kum 62 tlin thleng emaw, kum 5 chhung emaw thawh theih a nih thu te, pension kum 62 chu 65-ah tisang turin all India level-in pawlin an nawr mek thute a sawi bawk. PC Lawmkunga hian tun thla chiah MPSC chairman hna a thawk tawh dawn a ni.