Mizo ṭawng humhim a ṭul - CM

Mizoram Secondary School Teachers' Association (MISSTA) chuan nimin khan Synod Conference Centre-ah inkhawmpui an hmang a; khuallian, chief minister Lal Thanhawla chuan, Mizo ṭawng leh Mizo thu leh hla humhim a ṭul thu a sawi.

Chief Minister chuan, Mizo ṭawng dik tâwk lo hman leh intihhmuh a lâr zel chu pawi a tih thu leh a vei tak zet thu sawiin, "Mizo ṭawng mawi tak leh Mizo literature hauhsaknate humhim a nih theih nan zirtirtute an pawimawh tak zet a ni. Social media, cable TV leh chanchin thar puangtute leh zel pawhin Mizo ṭawng dik tâwk loa an hmang hi a pawi," a ti.

Ram rawngbawlna hrang hrang zingah zirtirtute mawhphurhna leh pawimawhna a sang bik hlea a hriat thu sawiin Lal Thanhawla chuan, "Zirtirtute file chu an zirlaite a nih avangin an inthlahdah a thiang lo," a ti a; zirtirtute chu naktuk, naktipa tu leh fate khua leh tui ṭha an nih theihna tura ni tina enkawl a, zirtirna pe ṭhintu an nih avangin rawngbawlnaa ngaia an hna thawk turin a chah.

MISSTA-ah hian member 1,052 an awm a, high school zirtirtu hnaruak hnawhkhah loh post 267 a awm mek a ni.