Ram siamthatnaah tumna a awm chuan Hma sawn zel theih a ni - Lalsawta

Mizoram University (MZU) chuan September 26, Thawhlehni khan MZU Auditorium-ah zirlai thar lawmna hun an buatsaih a; khuallian, Finance minister Lalsawta chuan, ram ei leh bar siam ṭhat kawngah tumna a awm chuan hma sawn zel theih a nih thu a sawi.

Finance Minister chuan, ram ei leh bar siamṭhat kawngah kalphung nghet tak awm tawh chu thlâk danglam harsa viau ṭhin mah se, tumna a awm chuan hma sawn zel theih a ni tih a sawi a, "June 20, 2015 aṭang khan vawiin thlengin Mizoram sorkarin RBI aṭangin daily transaction-ah pawisa vawi khat mah a la pûk leh lo a ni," a ti.

Lalsawta chuan, zirna leh hlawhtlinna kawngah mahni dinhmun aṭangin lungawi lohna emaw, harsatna hrang hrang nei ṭheuh thei ni mah ila, beidawng loa mahni inrintâwkna nen taimak chhuah phawt zel turin zirlaite a fuih a, ram nuam leh ngaihsanawma Mizoram siam turin a ram neitu kan mithiam ṭhalaite bak chu an awm chuan loh thu a sawi.

Sorkar hnaah luh vek theih a ni dawn lo tih sawiin Lalsawta chuan, "Sorkar hna thawh aia hlâwk thei zawk tur eizawnna ngaihtuaha ngaihven nachang hriat a pawimawh. Farming lam emaw, ran vulh lam emaw, themthiamna leh thil dang dangah entrepreneurial rilru pu taka hma lak chuan eizawnna eng pawh ni se, tuna kalphung pangngai aiin a let tam takin a hlâwk zawk a ni," a ti.

MZU vice chancellor Prof. Lianzela pawhin thu sawiin, zirlai tharte chu MZU zirlai an nih chhungin hun hlimawm tak leh hlâwk tak hmang tura a duh thu a sawi a, "Zirnaah theihtawp chhuah a, hlawhtling tum tak tak a ngai," a ti a; zirlaite chu MZU dan leh inkaihhruaina hre chianga zawm turin a chah.