Hmeichhe Local Ccouncil member-te tan training
State Institute of Rural Development & Panchayati Raj (SIRDPR) leh Panchayat Mahila Shakti Abhiyan (PMSA) ṭangkawp chuan, nimin khan Durtlang Leitana an hmunah Aizawl Municipal Corporation (AMC) huam chhunga hmeichhia, local council member-te tan training an buatsaih a, Rural Development minister R Lalzirliana'n a hmanpui.
R Lalzirliana chuan, ram inrêlbàwlnaa a fawng pawimawh chelh thei tur hmeichhia tam tak an awm tih sawiin, "Tun dinhmunah Mizoram pumah hmeichhia village council member 828 leh local council member 143 an awm mek. Hei hian politics mai ni lo, khawtlang leh ram inrêlbàwlnaa hmeichhiate hmasawnna a entir a ni," a ti.
RD Minister chuan, sorkar laipuiin Panchayati Raj anga V/C-te kalpui tura a tih ang leh, V/C neih mekte mawhphurhna keng ṭeuh ringawt lo a, thuneihna tam zawk an neih theih nan hmalak mek a nih thu a sawi a; hmeichhia LC member training tura kalte chu mipui thlan an ni tih inhria a, an zir turte hlâwkpui ngei turin duhsakna a hlan.
Training hi ni hnih awh tur a ni a; nimin khan 'Gender Issues in Mizoram: Problems & Prospects', 'Role of Women in Local Governance' tih leh 'Comparision of Panchayati Raj Institution & Village Councils' tih thupui zir niin, vawiinah 'Human Rights, Child Rights leh Women Rights' tih thupui zir a ni ang.