Mamit district-a hna thawhte thlirho

Mamit District Development Coordination & Monitoring Committee chu nimin khan Mamit DC conference hall-ah an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm a; Mamit district-a sorkar laipui scheme hrang hrangte hmanga hna thawhte an thlir lêt.

Meeting-a tarlan danin, Swacchh Bharat Mission (Gramin) hnuaia hmalakna chak taka kalpui zel a ni a, Reiek Block chu October 2, 2017-ah páwn lama inthiar awm lohna, open defecation free (ODF)-a puan tum niin, West Phaileng Block leh Zawlnuam Block pawh kumin tawp lamah ODF-a puan hman tum a ni.

MGNREGS hnuaiah kum 2017-18 chhungin ni 52 inhlawhna siam a ni tawh. Pradhan Mantri Awas Yojana (PMAYG) hnuaia in sak ṭanpuina hmanga in 225 sak turin ruahman a ni a, ṭanpuina dawngtu tur thlan kawngah Social Economic and Caste Census (SECC)-in duhthu a sâm loh avangin tehfung ennawn a nih theih nan thuneitu sang zawk hnenah thlen tura tih a ni.

National Social Assistance Programme (NSAP) hnuaiah kum kal mekah sum pek chhuah a la nih loh thu tarlan a ni. National Health Mission (NHM) hnuaiah hna thawhna tur sum duh anga a kal loh avangin hmalak a harsat thu meeting-ah sawi lan a ni a; Mid Day Meal hnuaiah naupang chawchhùn pek hna kalpui zel a nih rualin, duhthusama sum an dawn loh avangin harsatna an tawh thu tarlan a ni.

Rastria Madhyamik Shiksha Abhiyan (RMSA) hnuaiah zirnain hma a sawn theih nan hmalakna kalpui zel a ni a, Shaala Siddhi hmangin sikul tihchang­tlun mek zel a ni. Infiamna lamah hmasawn nan sport meet huaihawt a ni bawk.

Meeting-ah hian Mamit district-a MLA pahnih - Lalrinmawia Ralte leh VL Robiaka te pawh an tel a ni.