MJA-te'n oil palm hmun an tlawh

MJA, Kolasib district leh Mamit district-te chuan nimin khan Mamit district-a oil palm chíngtute hmalakna a hmunah an enpui. Mamit district leh Kolasib district hi Mizorama oil palm chínga hralh awm chhun an ni a, Bukvanneia Godrej Oil Palm Mill-ah kg. khat Rs. 5.50-in an hralh ṭhin tih an sawi.

District pahniha MJA-te tarlan danin, oil palm hi Mizoram sorkar, Godrej company leh kuthnathawktute'n inremna fel tak an siam angin chìn a ni. Oil palm chîngtute'n a rah phurh chhuahna leh a hralhna rate-ah harsatna an tawh avangin, an harsatna chu chingfel tura hma la thuai turin Mizoram sorkar an phût a ni.

Kolasib MJA president R Lalhming­thanga chuan, oil palm chu Mizoram sorkarin a chìntir a nih angin, harsatna chungchang ngaihtuah turin state level Oil palm Advisory Committee te, Price Fixation Committee-te din a ni a, tun thlenga committee-te hmalakna hriat tur a awm lo chu kut hnathawktute ngaihthahna a nih thu a sawi a; an harsatna chu a rang lama ngaihtuahsak tura a duh thu a sawi bawk. Mamit district-ah oil palm chíngtu mi 433 vel an awm a, mi 250 velin a rah an thar mek a; kum 2019 chhung khan oil palm metric ton 2349.20 an thar a, a hlut zawng chu cheng nuai 1,292 chuang a ni.