CBI hmanga mipui bum lo turin chah
BJP, Mizoram Pradesh chuan, MNF leh Congress party-te chu CBI koh luh leh koh luh loh chungchangah
Mizoram mipui bum tumah puhin, party pahnihte chu CBI koh luh chungchang sawi tawh lo turin an chah.
Nimina Mizoram BJP thuchhuah chuan, "Tunlaia MNF leh Congress party-in an hmai phihfai tumna ni âwm fahrana CBI koh luh chungchanga hma la anga mipui bum an tum leh ta hi a lungchhiatthlak kan ti," an ti.
BJP chuan, MNF leh Congress chu kum 30 chhung Mizo mipuite eirukna leh bumna hmanga kaihhruai tawh an nih thu sawiin, "MNF hun laia Health Care Scheme, Aii Pûk Scandal, Turial Hydel Project compensation, Police Modernization Scheme sum chingpen te, Congress sorkara Lottery Scam, Zo-Carbon, Dihmunzawl in ṭhiahte hi mipuiin an theihnghilh ngai dawn tawh lo," an ti a; Congress leh MNF chu Mizoram history-a hlemhletna lehkha phêka eirukna ziaktute an niin an sawi.
Mizoram BJP chuan Congress leh MNF party-te chu corruption nena inthlun zawm tlat nia sawiin, corruption laka fihlim âwm taka inlantir tum lo a, Pathian leh mipui hnena ngaihdam dil a, tisual nawn tawh lo turin an chah a ni.