Congress ṭhalaiin lawmthu sawi

Congress party ṭhalai (MPYCC) chuan thu­chhuah siamin, chief minister Lal Thanhawla'n MPYCC president Vanlalawmpuii Chawngthu minister of state-a a dah chu lawmawm an tih thu an tarlang a, "Ṭhalaite khawvel thar min dinsaktu CM Lal Thanhawla chungah thinlung takin kan lawm a ni," an ti.

MPYCC chuan, kum 2013 Assembly in­thlanah MPYCC hruaitu pathum chu candidate atan dah an nih thu sawiin, "Pu Lal Thanhawla kaihhruai Congress party-ah ṭhalaite'n hmun pawimawh tak kan luah a ni tih a takin a lantir tawh," an ti a; MPYCC president Vanlalawmpuii Chawngthu, MLA a nih hlim aṭanga Mizoram State Commission for Women chairperson-a dah a ni leh, tunah minister of state-a dah a ni leh ta chu Congress party-ah ṭhalaite tan kawng zau taka a inhawnzia entirtua an ngaih thu an tarlang a ni.