Lunglei khawpuia kawng Humhalh dan tur sawiho

Lunglei Town Road Protection Squad chu nimin khan Lunglei SDO (S) H Lalrinpuia hoin DC conference hall-ah an ṭhu­khawm a, Lunglei khawpui chhung kawng humhalh chungchang leh mipui te an lo him zawk theihna tura hmalak dan tur an sawiho.

H Lalrinpuia chuan Lunglei khawpui ṭhang zelah kawng humhalh tura ṭan lak a hun takzet tih sawiin, "Lunglei khawpui kawng a len loh avang leh bypass road te kan neih loh avangin hun lo kal zel turah kan kawngpui dung chep lutukin a la awm mai dawn a ni. Road Protection Squad thiltumte ti hlawhtling turin member-te'n nasa taka ṭan kan lak a ṭul a ni," a ti.

Lunglei SP Lalṭha­fam­kima Jongte chuan khaw­pui kawng humhalh chak taka kalpui tur chuan department hrang hrangten thawhhona ṭha tak an neih a ṭul bakah tlawmngai pawl leh khawtlang hruaitute te nen ṭan lak ho a ṭul tih sawiin, "Mipuiten vantlang hmun an zah a ṭul bakah sorkarin dan mumal tak a siam te kan zawm ṭheuh a ṭul a ni," a ti a, kawng humahalh hna hi dan behchhan chunga khawng taka kalpui a ṭul thu a sawi.

Road Protection Squad member-te hian September 22, 2017 khan ‘spot verification’ neiin Lunglei khawpui chhung hmun hrang hrang tlawh kualin kawngpui dinhmun an enfiah a. He an inspection-a vantlang kawng nek chep, tuiluankawr chhia, kawngpui dunga in sakna bungrua dah, parking phal lohna a motor hun, kawngpuia tui/thli luantir an hmuhte meeting-ah hian an sawiho a ni.

Lunglei District Road Safety Committee hian September 11, 2017-a an ṭhutkhawm ṭuma rel angin Lunglei khawpui chhunga autorickshaw driver te tan training neih mek a ni, veng tina lirthei awm zat survey leh motor document, driving license uluk taka enfiah turin ruahmanna siam chhoh mek a ni.