KHAWTHLIR

MSCW chairperson
Mizoram sorkar chuan Mizoram State Commission for Women (MSCW) chairperson atan M Zohmingthangi, IAS (Rtd.) a ruat thar. M Zohmingthangi hi Aizawl Municipal Corporation-a councillor ni lai a ni a, Ward XVIII bialtu a ni.

Sub-centre hawng
Chanmari West-a Health Sub-Centre thar chu nimin khan Health minister Lal Thanzara'n a hawng. Minister chuan, mipui hriselna atan Health department-in ṭan a lak thu sawiin, "Programme hrang hrang a kalpui mek hlawhtlinna turin tha leh zung tam tak a sêng a, mipui hriselna pawhin hma a sawnin kan hria," a ti. Sub-Centre building thar hi cheng nuai 14 sênga sak a ni a, sq.metre 32.5-a zau a ni.

Mi 39,040 inentir
August 2017 chhung khan Aizawl Civil Hospital-ah mi 39,040 an inentir a, mi 1,257 admit an ni a, nau piang 334 awmin, mitthi 60 an awm. Damlo inentir zinga mi 278 chu state páwna enkawl tura thawn an ni.

CM relief fund
Mizoram Secondary School Teachers' Association (MISSTA) chuan, nimin khan Chief Minister's Relief Fund atan Rs. 1,00,000 an chhung lut. CM Relief Fund hi an president K Zatlunga'n Chief Minister hnenah a hlan a ni.

Lak luh khap
Mamit DC chuan thupek chhuahin, Tripura-a Kheda khua leh a chheh-velah ui a hri (rabies) a lêng tih hriat a nih thu a tarlang a, "Mizoram páwn, a bik takin Tripura aṭangin ui reng reng Mamit district chhungah lak luh khap tlat a ni," a ti. Thupek hian thla hnih chhung a huam ang.

Journalist râl
Mizoram sorkar chuan tun hnaia journalist thi pahnih - Lalthanzama (Sakeibaknei) leh K Lawmsanga (Newslink) chhungte hnenah nimin khan sorkar aṭanga ràlna a hlan. Ex-gratia hlanna inkhawm hi IPR director Lalnithangi pisaah neih a ni a, IPR Director-in mitthi chhungte hnenah a hlan a ni.