KHAWTHLIR

NSS State Office leh AVBD chuan nimin khan Aizawl Civil Hospital blood bank-ah blood donation camp an huaihawt a; higher secondary school pahnih - JL HSS, Synod HSS leh ICFAI University-a NSS unit-te'n thisen unit 40 an pe a, petute mipa 34 leh hmeichhia pariat an ni. Individual donor mi pahnih an awm. Kolasib Bial AYF huaihawtin nimin khan Khamrang, Kawnpui, Meidum leh Saihapuia AYF member-te'n Kolasib-ah thisen unit 10 an pe bawk.

Zokhawthara Mizoram police leh YMA duty-te chuan nimin zing dar 1-2 inkar khan Lalchung­nunga (32) h/o Ram­hmingthangi, Zokhawthar Champhai Road-te in aṭangin methamphetamine mûm 9,000 leh a phut chi kg. khat vel leh, heroin hawng 24 an man. Ruihhlo an mante hi Mizorama an hralhna ang chuan cheng nuai 10 vel hû a ni.

Biakzami (44) d/o Lt. Col. Lalramhluna (Rtd.) chu May 5, Thawhlehni tlai khan Chite luiah chesual­in tuilianin a la a, zawn nghal a ni. Nimin khan Aizawla veng ṭhenkhat aṭanga thawk chhuak mi eng emaw zatin an zawng a, nimin tlai thleng khan hmuh a la ni lo.

Aizawl South-ll bialtu MLA Lalchhuanthanga chuan, a bial chhunga khawsak harsate tan local task force kaltlang­in Tlangnuam West, Tlangnuam Vengthar leh Kawltheihuan (Mission Veng)-ahte inhlawhna a siamsak. Inhlawhna atan hian inkalpawhna kawng siamṭhat leh kawng sira tuihâwk luankawr siam hna thawh a ni a; task force-te'n an venga khawsak harsa deuhte inhlawh tura thlang chhuakin, an thawhtir a ni.

Aizawl District Magistrate-in May 4, 2020 aṭanga zan tin dar 7 aṭanga zing dar 4 inkara páwna chhuah khapna thupek a chhuahin a huam loh tur zingah PHE department leh IPR department-a emergency leh night duty-te belh 

a ni. Nilainia chhuak Vanglainia 'AMC huam chhunga mimal two wheeler-te tlân chhuak thei zingah an tel loh thu a tarlang' tih chu a dik tâwk lo a, 'AMC area-a mimal lirtheiah ṭhutna awm zat aṭanga 50% aia tam chuan phal a ni lo' tihin private two wheeler-te a huam loh thu a nih zawk thu DC office aṭangin dawn a ni.

State Disaster Management State Executive Committee chairman Lalnunmawia Chuaungo chuan thuchhuah siamin, police sub-inspector chin chung lamte leh police station officer-in-charge zawng zawngte chu Disaster Management Act, 2005 bawhchhiatna awm nia an hriat chuan complaint an file phalsak a nih thu a tarlang.

Lalrinfela (35) s/o Zothanmawia, West Phaileng Dinthar chu May 4, Thawhṭanni khan thingthupui kûng aṭangin a tla hlum nia hriat a ni. Thu dawn danin, Lalrinfela hi May 4 chhuna chawhmeh vai tura a chhuak a haw loh avangin zawn a ni a, Thawhlehni zingah thingthupui kûng bulah thia hmuh a ni.

Chakma Autono­mous District Council (CADC) chhunga Zo hnahthlak awmte'n inkhàrkhip a nih mek laia Chakma-te laka enhran an tawh avanga an thlavâng hauh tur leh ei leh bara harsatna tâwkte a ṭul anga ṭanpui turin nimin khan MZP Vice President leh General Secretary ten CADC an pan. MZP thuchhuah chuan, "Ram leilung fate'n kan ram chhung ngeiah hnam dang laka harsatna an tâwk ṭhin hi kan hrethiam lo hle a, ram leilung fate thlavâng hauh tur hian MZP chu a ṭul angin a che chhuak zel dawn a ni," a ti. MZP chuan, private sikulte'n zirlaite aṭangin fee 50% aia sang lo la tura thutlukna an siam chu lawmawm an tih thu an sawi bawk.