SDRF sum Rs. 5,35,46,448 hmang tawh

State Disaster Management Authority (SDMA) chu an chairman Zoramthanga, chief minister hoin nimin khan CMO Cabinet room-ah an ṭhu a; Covid-19 donaa hmalakna atan State Disaster Response Fund (SDRF) 2019-20 aṭangin Rs. 5,35,46,448 hman a nih tawh thu tarlan a ni.

Sorkar thuchhuah tarlan danin, Covid-19 donaa quarantine, sample collection leh screening atan sorkar laipuiin State Disaster Response Fund (SDRF) 2019-20 aṭangin 25% leh hmanrua mamawh zual (equipment, lab.) atan 10% hman a phal a; chumi anga Mizoram SDRF 2019-20 sum hman theih chu nuai 700 a ni. Cheng nuai 700 aṭangin Rs. 5,35,46,448 hman a ni tawh a, Rs. 1,64,53,552 a la bâng.

District hrang hranga quarantine facility-a awmte ei tur a thlâwna pek an ni a, mi pakhat tan ni tin Rs. 300 bituk a nih thu leh, state páwna tangkhang haw mi 1,750 vel tana senso tur chu Rs. 73,75,000 vel a nih thu an sawi a; rawn hawte enfiahna rapid test kit atan mi pakhatah Rs. 700 zel a nih thu an sawi bawk.

Meeting-ah hian, deputy chief minister Tawnluia, Health minister Dr R Lalthangliana, DMR minister Lalchamliana, minister R Lalzirliana, minister of state TJ Lalnuntluanga leh member dangte an tel a ni.