A rûka hawte khung hrang turin phût

ZPM party chuan thuchhuah siamin, sorkar official-te hriattir loa mahni thua state páwn aṭanga tun hnaia Mizorama lo hawte chu khung hrang (quarantine) turin sorkar an phût tih an tarlang.

ZPM chuan, Home Secretary-in May 4, Thawhlehnia thuchhuah a siamah, hmarchhak state-a Mizoram mi tangkhangte sorkar ruahmanna anga hawtir an nih laiin, sorkar aiawhte hriattir loa mahni thua haw mi 150 an awm thu tarlan a ni tih an sawi a, "Mizoram sorkar ruahmanna uluk tak siama tangkhangte a theih ang anga an hruai luh a, quarantine centre-a dah nghal vek an nih laia a rûk a rála sorkar hriatpui loha mi 150 lai an lo lut hian Mizoram himna a tiderthâwng hle a ni," an ti.

Sorkar hriatpui loha mahni thua Mizorama hawte chu a zat nen lam Home Secretary-in a tarlan theih avangin anmahni pawh sorkarin a hre chiang hle nia a lan thu sawiin ZPM chuan, "A rang thei ang berin heng mite hi an chhungte zawng zawng nen quarantine centre-a dah nghal tur leh quarantine hun a tàwpah an chungah hremna khauh tak lekkawh zui turin sorkar kan phût a ni," an ti a; a ruka hawte'n an haw hnua an kawmte pawh chhui chhuak vek turin an phût bawk tih an sawi a ni.