Sikserh hluarna ber state Mizoram Thla 8 chhungin sikserh vei 7,672 hmu

National Vector Borne Disease Control Programme (NVBDCP) leh India ram state 10-a Health & Family Welfare department-te'n Regional Review Meeting an buatsaih chu nimin khan Assembly Annexe confe­rence hall-ah Health minister Dr R Lalthang­liana'n a hawng. January-August 2022 chhungin Mizoramah sikserh vei mi 7,672 hmuh chhuah a ni a, mi pangain an thihpui a, Mizoram chu India rama sikserh hluarna ber state a ni tih tarlan a ni.

Ni thum awh tur ṭhutkhawma tarlan danin, kumin January-August chhungin Mizoramah sikserh vei mi 7,672 hmuh chhuah a ni a, chu'ng zinga mi panga chuan an thihpui.

Kum 2021 chhung khan Mizo­ramah sikserh vei mi 5,637 hmuh chhuah niin, sikserh vanga thi mi 10 an awm. Sikserh vei kum 2021 chhunga hmuh chhuah zat aiin kumin 2022 thla riat chhunga hmuh chhuah hi mi 2,035-in an tam zawk.

Health Minister chuan, review meeting chuan sikserh ûm bona turah awmze thui tak a neih a beisei thu sawiin, "Mizoram hi India ramah mihring awm zat aṭanga teha sikserh vei hmuh chhuah tamna ber a ni a, hmabak kan la ngahzia leh ṭan lak nasat a ṭulzia a chiang hle," a ti a; state dang aṭanga tel mithiamte chu Mizoram dinhmun veipui a, hmalak dan kawng ṭha zawk ngaihtuahpui turin a sáwm.

Mizorama sikserh vei zinga 80% chu Lunglei, Lawngtlai, Siaha leh Mamit district-a awm an nih thu sawiin Dr R Lalthangliana chuan, "Heng district pali hi tehfunga a sang ber category 3: Intensified Control Phase (High Endemic District)-ah an awm a, a bak district dang zawng chu category 1: Elimination Phase (Low Endemic District), sikserh ûm bo thei dinhmuna ding an ni tawh," a ti.

Health Minister chuan, pawl hrang hrang, kohhran hrang hrang, zirna-inte leh village council-te nen thapui thawha sikserh doa ṭanrual a ṭul thu a sawi bawk.

Ṭhutkhawm hawnna inkhawm hi Health secretary Esther Lalruatkimi'n a kaihruai a; sorkar laipuia Ministry of Health & Family Welfare director Dr Tanu Jain leh Mizoram NHM mission director Dr Eric Zomawia te pawhin thu an sawi.

Regional Review Meeting hi kum tin thla thum danah neih ṭhin a ni a, Global Fund for AIDS, Tuberculosis, Malaria (GFATM) projected state 10 - Assam, Meghalaya, Tripura, Nagaland, Arunachal Pradesh, Manipur, Mizoram, Jharkhand, Odisha leh Chhattisgarh-a Vector Borne Disease Control prog­ramme officer te, regional director te, consultant-te leh sorkar laipuia mithiamte an tel ṭhin.

India rama sikserh ûm bo a nih theih nana hmasawnna tur zirhona te, sikserh tihrêmna programme hmalakna leh activity-te thlirho a ni.

REVIEW MEETING-A TARLANTE
1) Mizoram chu India rama sikserh hluarna ber state a ni.
2) January-December, 2021 chhungin Mizoramah sikserh vei mi 5,637 hmuh a ni a, sikserh vangin mi 10 an thi.
3) January-August, 2022 chhungin Mizoramah sikserh vei mi 7,672 hmuh a ni a, mi panga an thi.
4) Kum 2021 aiin kum 2022-a thla riat chhunga sikserh vei hmuh 2,035-in a tam zawk.
5) Sorkar laipuia Anti-Malarial Drugs leh Rapid Diagnostic Kits bakah, mithiam an rawn tirhte nen hmalak mek a ni a, nakkumah hmasawn beisei a ni.
6) Lunglei, Lawngtlai, Mamit leh Siaha district-te chu sikserh hluarna district an ni.
7) India sorkarin kum 2030-ah India ram aṭangin sikserh um bo a tum.
8) NHM/Health department hmalaknain intersectoral convergence atan Mizoram sorkar department hrang hrangte thawhhona turin hmalak mek a ni.