Social media-a thu tarlan avangin Ṭamdil Picnic Spot enkawltu bân a ni ; 'Ka dawnsawn laiin zu ka in lo' - Lalrohlua

Tourism department enkawl Ṭamdil Picnic Spot ṭha lo leh a enkawltu ruih thu social media-a tarlan a nih vangin Ṭamdil Picnic Spot-a boatman (IV grade) K Lalrohlua chu a hna aṭangin September 28, 2022 khan bân a ni. K Lalrohlua chuan, Twitter-a thu post-tu a dawnsawn laiin zu a in loh thu leh a ruih loh thu a sawi.

Nilanjan chuan, Ṭamdila a kal chungchang September 27, 2022 chawhnu dar 2 vel khan Twitter-ah a dah a; Ṭamdil enkawltu a ruih thu te, bual-inah tui a awm loh thu te, thosilên a ṭeh thu te, street light a awm loh thu te, darthlalang a keh thu te, bed cover a ṭhat loh thute ziakin chu'ng thlalakte chu a tarlang a; social media hrang hrangah midangin an thehdarh zui bawk.

Social media-a thu thehdarh vang nia ngaih theihin Tourism director Saitluanga chuan Sep­tember 28, 2022 khan office order a tichhuak a; Ṭamdil Picnic Spot-a boatman K Lalrohlua, a nghet loa thawk mek chu a hna aṭanga bàn a nih thu a tarlang.

Tourism Director lehkhaah chuan, K Lalrohlua chuan sorkarin tih tur leh mawhphurhna a pek angte ti loin, sorkar hnathawkte awm dan tur leh inthununna pawisa loin zu rui chungin mikhual a dawnsawn thu te, a duty-na hmunhmate a enkawl ṭhat loh avangin vawi tam tak hotute'n insiamṭha tura an hrilh tawh thu te, thu awih loin sorkar leh department nasa taka timualphoin mikhualte lakah a khawsak leh thute a chuang.

K Lalrohlua chu Mizoram sorkara Guidelines for Engagement of Provisional Employee angin a hna aṭanga bàn a nih thu Tourism Director chuan a tarlang a ni.

Hetih lai hian K Lalrohlua chuan Vanglaini palai zawhna chhangin, thil thleng chungchangah depart­ment hotute'n thu an zawhfiah loh thu a sawi a, "Bàn ka nih thu ka hre tawp a, a mak ka tiin, ka rilru a na khawp mai," a ti.

K Lalrohlua chuan, Twitter-a thu post-tu a dawnsawn laiin zu a in loh thu sawiin, "Zêp thu chêng lo, zu chu ka in ve ṭhin ngei a, ka duty lai chuan ka in ngai lo. Ka duty zawh hnuah erawh ka in ve ṭhin," a ti a; Twitter-a post-tu thlen ṭumin mi dang thleng ve an awm thu leh a fapa thih champha vawi khatna a nih avangin a zia a lo danglam palh theih thu thu a sawi.

Ṭamdil enkawl hna kum 18 a thawk tawh tih sawiin K Lalrohlua chuan, "Ka thiam leh phâk tâwk chuan ka enkawl vein ka hria. Kan nu nen kan awm chilh a, Pathianniah khaw chhungah kan lut a, kan nu inkhawm zawhah kan lêt leh nghal ṭhin," a ti.

K Lalrohlua sawi danin, kum 2016 khan Ṭamdila Forest depart-ment hmunhma enkawltu nen hêk an nih avangin koh an ni a, chu bak chu koh emaw, vaukhânna (warning) pek emaw a la tawng lo.

Ṭamdil Picnic Spot electric bill leh a enkawl/cheibawl chu K Lalrohlua kutah dah vek a ni a, February 2022 khan rawng hnawih ṭhat a nih bakah, commode-te thlâk a ni. Mikhual an tam ngai lo a, sum lut a tam thei lo a, ṭha taka enkawlna tham sum a lut meuh lo a ni.