Hna thawh muang lutuk hi a fel lo - Governor

Governor Dr Hari Babu Kambhampati chuan nimin khan Serchhip a tlawh a, Serchhipa sorkar, bank, kohhran, pawl, political party aiawhte leh thuthar thehdarhtute a kâwm. Larsap chuan, project ṭhenkhat-a hna thawh chhung rei lutuk ṭhin leh hna thawh hun chhung pawhsei a ni fo chu thil fel lo tak a nih thu a sawi.

Dr Hari Babu Kambhampati chuan, project ṭhenkhat thawh chhung rei lutuk chuan project thar thawh tur awm theite a dang ṭhin tih sawiin, "Mipui tana hmasawnna ruhrel ṭha tak tak turte kan chàn phah thei," a ti.

Mizoram hmun hrang hrangah mipui tam zawkin central welfare scheme ṭha tak tak, cheng tlêmtê kum khat atana pek a, cheng nuai tél hmuh theihna turte an hre lo hle tih a hmuh thu sawiin Governor chuan, "A pawi ka ti hle. Hengahte hian zirtirna kalpui nasat a ṭul a, banker-te'n scheme ṭha tak tak beneficiary-te hriattir hi an mawhphurhna a ni," a ti a; sorkar laipui scheme puanzar kawngah sorkar department-te ṭan a ngaih thu a sawi.

Serchhip district chu district ralmuang ber nia a hriat thu te, kawng ṭhenkhatah hmalakna ṭha tak tak hmuh tur a awm thu leh faina kawngah hma an la ṭha hle nia a hriat thute a sawi bawk.

Serchhip DC Nazuk Kumar tarlan danin, Serchhip district hi sq.km. 1,421.6-a zau niin, mi 80,000 vel an chêng a; VC 54, civil sub division pathum, RD block leh MLA bial pahnih ve ve a awm.

Serchhip SP Stephen Lalrinawma pawhin, Serchhip district-ah police 153 awm tur a nih laiin, 110 chiah an awm mek thu a sawi bawk.