World Heart Day hman a ni

Nimin, September 29 kha World Heart Day a ni a, National Programme for Prevention & Control of Cancer, Diabetes, Cardiovascular Diseases & Stroke (NPCDCS) bultumin Aizawla Taxation Auditorium-ah hman niin, Health & Family Welfare Board vice chairman Dr ZR Thiamsanga, MLA-in a hmanpui. Day hi district dang ṭhenkhatah pawh hman a ni.

World Heart Day hmanna inkhawm hi NHM mission director Dr Eric Zomawia'n a kaihruai a, Day thupui, 'Use heart for every heart' tih a sawifiah. Khuallianin thu a sawi bakah, cardiologist Dr Van­lalmalsawmdawngliana, MD, DM-in lungphu châwl chungchang a sawi bawk.

Dr ZR Thiamsanga chuan, lung natna chu khawvela thihna thlentu tam ber a nih thu a sawi a, "Lung hrisel kan neih theih nan ei leh in hrisel neih ṭhat te, taksa sâwizawi ṭhat te, mut hunbi mumal tak neih te, lung lam ṭha lo nei mek leh la nei lote tan pawh nun dan vawn uluk leh phâk ang tâwka hriselna ngaih pawimawh a ṭul," a ti.

Inkhawmah hian Synod Hospital College of Nursing zirlaite'n lungphu châwl natna chungchang zirtirna lemchan hmangin an entir a ni.

World Heart Day hi kum 2000 aṭang khan kum tin September 29-ah hman ṭhin a ni.