Party hruaitu zinga dâwt sawi ngun ber Mizoram mipuiin an hre tawh - MPCC

30th September, 2022

Mizoram Pradesh Congress Committee (MPCC) chuan thuchhuah siamin, Mizorama political party hruaitute zinga dâwt sawi thiam ber leh dâwt sawi ngun ber Mizoram mipuiin an hre tawh niin an tarlang.

MPCC chuan, mahni dâwt sawi thupna atana MNF president leh chief minister Zoramthanga’n thu chhumbung sawi ṭhin anga mi dang a puh chu hriatthiam harsa an tih thu an tarlang a, "Mizoram mipui hian party hruaitute zingah tu ber hi nge mipui hnena dâwt sawi ngun ber leh dâwt sawi thiam ber an hre tawh. Hetiang mi ram hruaitu kan nei hi a vanduaithlak rualin, Congress party thawh lehna hmanrua atana MNF-in president atana Pu Zoramthanga an nei hi a lawmawm kan ti hle thung," an ti.

MPCC-IN CM ZORAMTHANGA THUSAWI AN TARLAN ṬHENKHAT
* January 17, 2019-a Union minister Hardeep Singh Puri a hmuh ṭumin ‘Kawng chhâwng zir chiang tur study team rawn tirh a tum a, football stadium paruk siamna min pe dawn’ a ti.
* January 24, 2019-ah Aibawkah Citizenship Amendment Bill (CAB) hi kan duh lo a, na takin kan do zel dawn, a ṭul a nih chuan NDA aṭanga inhnuhdawh pawh kan hreh lo’ a ti a; mahse, Parliament-ah CAB an thláwp.
* May 9, 2019-a Mizoram Engineering Service Association inkhawmpui a hmanpuinaah 'Hnam dang contractor leh supplier a tlem thei ang ber chhawr kan tum' a ti a; mahse, hnam dang contractor-te chu ni khat pawh Treasury-a bill táng loa bill la nghal thei an ni fur.
* July 20, 2019-ah 'Ruihhlo ngai sim tawhte eizawnna siam sak kan tum,' a ti a; hmalakna hmuh tur a la awm lo.
* July 22, 2019-ah, 'Ramri buai hi a chinfel dan tur felfai tak kan nei,' tih thu a sawi a; ramri buai chinfel a la ni lo.
* February 21, 2019-a Synod Executive Committee member-te leh MLA-te Synod Office-a inkawmhonaah, Rangvamual leh hmun ṭhenkhata zu zuarte chu sum séng zawnga ṭanpui loin, eizawnna siamsak a tum thu a sawi a, 'A aia hlâwk zawk eizawnna an neih hnuah chuan tu mahin zu an zuar peih tawh lo ang,' a ti. Mahse, hmalakna pakhat mah a la awm lo a, kohhran hruaitute hmaah pawh mumang sawi a ṭhulh lo.