Minister-in TT-a inelna a hawng

Mizoram Table Tennis Association (MTTA) in Mizoram State Sports Council puihnaa Mizoram Ranking Table Tennis Championship 2022 an buatsaih chu nimin khan Aizawl West Joint YMA Hall-ah minister of state Lalruatkima'n a hawng. Minister hian inelna atan table tennis board pahnih a leisak a ni.

Lalruatkima chuan, Mizote'n table tennis an hmelhriatna a la rei loh ngaihtuahin hlawhtling tak tak, Mizoram leh India tihmingṭhatu an awm thu sawiin, "Hei hi association hruaitute thawhrimna leh inpekna vang leh, player-te ṭhahnemngaihna leh tumruhna vang a ni," a ti a; ṭhalaite theihna hâi chhuak tura inelna neih a ṭul thu a sawi.

Mizoram sorkarin infiammite hamṭhatna leh mumal zawka association-te inkaihhruai nan Mizoram Sports Policy a nei tih sawiin Lalruatkima chuan, "Hemi hmang hian sorkarin infiamna leh infiammite hmasawnna ngaihtuahin hma a la zel dawn. Infiamna leh lehkha zir chu a kal kawp theih rualin, hlawhtling tur chuan mi aia pên tam leh thawhrim a ngai," a ti.

Table Tennis Championship hi October 1, 2022 thleng neih tur a ni a; category 13-ah association pahnih leh club 15 aṭangin mi 135 an tel a ni.