Mizoramah airport siam belh turin MP-in sorkar laipui hotute a ngen

Lok Sabha MP C Lalrosanga chu nimin khan New Delhi-a Ministry of Development of North Eastern Region (DoNER) Parliamentary Consultative Committee ṭhutkhawmah a tel a, Mizoram khawchhak lam leh chhim lamah thlawhtheihna ṭumhmun siam a nih theih nan hma la turin sorkar laipui a ngen.

Ṭhutkhawmah hian hmarchhak biala zin mi tam zawk hîp luhna tur leh enkawlna ṭha zawk siam chungchang sawiho a ni a; DoNER minister G Kishan Reddy hoin MP-te leh ministry hrang hrang aiawhte an tel.

C Lalrosanga chuan, Mizoramin thlawhna ṭumhmun pakhat a neih chu a tâwk lo tih sawiin, "Tourism leh kawng danga hmasawn nan Mizoram khawchhak leh chhim lamah thlawhna ṭumhmun neih ngei a ṭul," a ti a; hma thar la chak turin Civil Aviation Ministry thuneitute a ngen.

Mizoram chhim leh khawchhak lamahte zin mite tlawh duh tur hmun hrang hrang a awm tih sawiin C Lalrosanga chuan, "Rél leh lirtheia tlawh tur hmun hlui leh mawi tak tak tlawhpawh leh tihchangtlun turte a awm," a ti.

Lok Sabha MP chuan, Mizoram khawchhak lama pipute sûlhnu humhalh chunga zinmite tana tlawhpawh theihna tur ruahmanna siam a rawt a; Mizoram chhim lam thlenga rél kawng siam tur leh chuta tana hmalak tawhte tharthawh leh turin Railways Board aiawhte a ngen bawk.