Zonuama naute laka pawikhawihna thlengah FIR thehluh a ni

Tun hnaia Zonuam, Aizawla naute kum 2 leh thla 5 mi chunga pawikhawihna thleng chungchangah social activist Vanramchhuangi, Chaltlang chuan nimin khan Zonuam Police Station-ah first informa­tion report (FIR) a thehlut.

FIR thehluttu chuan, pawikhawihna chu Ministry of Home Affairs-in pawngsual thubuai chhui dan tura a siam Standard of Procedure hmanga chhui ngei turin police-te a ngen.

Thu dawn danin, MHA Standard Proce­dure-ah chuan, mipat hmeichhiatna kaih­hnawiha pawikhawihna (sexual offence case)-ah ground level investigation public prosecutor-te kaihhruaina hnuaiah chhui tur a ni.

FIR-ah hian Van­ramchhuangi chuan, naute pa, Hmangaih­tluanga leh naute nu Lalhriatkimi, Zonuamte lo chu rinhlelh a nei loh thu a ziak a, "He mite nupa hi naute khawih chhetua vantlang pawhin an rin ber a ni," a ti.

The Protection of Chil­dren from Sexual Offences Act, 2012-ah aggravated penetrative sexual assault a awm avangin pawikhawihtu rinhlelh an awm chuan man tur a nih laia tun thlenga man an la awm lo chu hriatthiam har a tih thu tarlangin, "Pawikhawihtu ni ngeia rinhlelh kai ber, naute nu leh pate zalêna an la awm cheu hi ground level investigation atan thil pawi tak thlen thei a nih avangin, anni nupa hi khung hran vat a ṭul," a ti bawk.

Thu dawn danin, September 16, 2022 zan dar 11:25-a thi Zonuam venga hmeichhhe naute pakhat chu pawngsual a nia hriat a nih chungchangah doctor-te report aṭangin police-te'n thubuai an ziak lut tawh a ni.

Mizoram State Commission for Protection of Child Rights leh MHIP General Headquarters hotute chuan police hmalak dan ngaichângin September 27, 2022 khan Aizawl SP-ah an kal a; anmahni lo dawngsawngtu additional SP PC Lalṭanpuia chuan, naute thih chhan tak chu pawngsual a tawh vang ni loin, natna dangin a tlâkbuak vang a nih thu a lo hrilh.

September 28, Nilaini pawh khan naute khuaikhemtu chhui chhuaha man thuai phutin mi eng emaw zat chu Vanapa Hall kawtah an pungkhawm a; thuziak chi hrang hrang kengin, rorelna dik an duh thu te, fanute zahawmna humhim tura mipate ngennate leh thu dangte an tarlang.