Champhai district-ah kuminah ruihhlo Cheng nuai 2,532.14 hû man tawh

Champhai District Narco Coordination Centre (NCORD) Committee chu nimin khan an chairman James Lalrinchhana, district bawrhsap hoin SP pisaah an ṭhukhawm. January 1 - September 29, 2022 chhungin Champhaia police leh Excise & Narcotics department ten ruihhlo cheng nuai 2,532.14 hû an man tih tarlan a ni.

Ṭhutkhawma tarlan danin, January 1 aṭanga September 29, 2022 thlengin Champhai police-te'n cheng nuai 223.80 hû heroin gram 9,694, nuai 1,637 hû methamphetamine mûm 8,18,500 leh nuai 126 hû pseudoephedrine mûm 1,80,000 an man. NDPS Act, 1985 hnuaiah thubuai 65 an ziak lut a, mi 83 man niin, chu'ng zinga 23 chu ram dang mi an ni.

Champhaia Excise & Narcotics department-in kumin January - September 29 chhungin cheng nuai 93.18 hu heroin kg 7.765, nuai 452.1 hu methamphetamine mûm 1,50,700, ganja kg 3.2 leh alprazolam mûm 218 an man bawk a; NDPS Act hnuaiah thubuai 49 ziak lutin, mi 49 an man a ni.

Bawrhsap James Lalrinchhana chuan, Champhai district-a ruihhlo donaah sorkar official leh YMA inkarah thawhhona ṭha a awm ṭhin chu lawmawm a tih thu sawiin, "Mizoram mai ni lo, India ram laili thlenga ruihhlo tawlh thlakin bu a khuar theih avangin ramri depa awm Champhai district aṭang hian theihtawp chhuaha hmalak a ṭul. Champhai district-in engtin nge hma a lak tih leh ruihhlo do kawnga ṭanrualna chu mite thlir leh ngaihchan a nih avangin inthlahdah lo leh inenfiah chung zela kal a ngai," a ti.

Champhai SP Lalrinpuia Varte pawhin thu sawiin, "Ruihhlo tawlh leh hmansual hi ram tana hlauhawm a ni tih hriain sorkar laipuiin NCORD hi kum 2016-ah a din a, kum 2019-ah siamṭhat niin, tun hnaiah chak lehzuala kalpui a ni," a ti.

Lalrinpuia Varte chuan, May 10, 2022-ah District NCORD Committee member-te state sorkarin a din thu a sawi a; hmalaknate Narcotics Control Bureau-ah online hmanga report zel a nih thu a sawi bawk.