Myanmar ráltlânte zawm tur tichhuak Dawr hawn / sumdawn phalsak an ni lo

Aizawl district bawrhsap Dr Lalhriatzuali Ralte chuan Myanmar tualchhung buaina avanga sahimna zawnga Mizorama ráltlânte tih tur leh tih loh turte a tarlang a, ṭha taka zâwm turin a chah.

Aizawl DC chuan, Myanmar raltlante tana inkaihhruaina leh hriattirna a lo chhuah tawhte chu ṭha zawka zâwm turin local/village task group on Myanmar refugees-te a chah bakah, pawl hrang hrangte chu hma la turin a ngen a; ráltlante zawm tur hrang hrang tarlangin, "Khua leh veng tina Myanmar raltlan awmte'n an zawm ngei ngei turin kan inhriattir nawn leh a ni," a ti.

Bawrhsap hriattirnaa a lan danin, raltlante chu anmahni duhthuin dawr hawn leh sumdawnna kalpui phal a ni lo a, India ram dan leh hraite zawm tura hriattir an ni. Dan loin Aadhaar card, voter ID, driving license leh document pawimawh dangte siam phal a ni lo.

Myanmar aṭanga Mizorama raltlan awm mekte chu The Mizoram Land Revenue Act, 2013 angin ram leh in hmun lei leh neitu nihna pek phal a ni lo a; lirthei keng lutte chu local/village task group on Myanmar refugees hnenah inhriattir tur a ni.

RALTLANTE TIH TUR LEH TIH LOH TUR
* Raltlan lut tharte tan local/village task group on Myanmar refugees hnenah inhriattir tur a ni a, hearing zawhah DC Office-in identity card a siamsak ang.
* Aizawl district-a relief camp-a awm turte'n DC aṭangin phalna an la hmasa tur a ni.
* Dan phal loh sumdawnna kalpui leh Mizorama dan leh hrai leh khawtlang dante kalh zawnga awm loh tur a ni a, India ram dan leh hraite zawm tur.
* Mahni duhthuin dawr hawn leh sumdawnna kalpui phal a ni lo.
* Hmun danga insawn tur leh awm bo ngaite chu relief camp in-charge emaw, awmna khua/venga task group hnenah inhriattir tur a ni a, anni'n DC-a an hriattir hnuah DC office-in phalna a pe ang.
* Khua/ram danga zin tur tan thuneitute hnen aṭangin phalna lak hmasak a ngai.
* The Mizoram Land Revenue Act, 2013 angin ram leh in hmun lei leh neitu nihna neih theih a ni lo.
* Lirthei rawn luhpuite chuan task group hnenah hriattir tur.
* Dan ang thlapa rawn lut, dan hnuaia lirthei khalh phalna international driving permit/license neite chauhin lirthei khalh phal a ni.
* Dan loin Aadhaar card, voter ID, driving license leh a dangte siam phal a ni lo.