Tui harsatna sukiang thuai turin MPYCC-in Deputy CM an phût

Congress ṭhalaite chuan an president Dr Lalmalsawma Nghaka hoin nimin khan deputy chief minister Tawnluia, PHE department changtu hnenah lehkha an thehlut a, Aizawla tui harsatna sukiang thuai tur leh chhuanlam siam tawh lo turin an phût.

MPYCC lehkhaah hian, Aizawl mipuite'n tui harsatna nasa tak an tâwk leh tawh tih Deputy CM hrilhin, "He harsatna hi a rang lama sukiang turin kan phût che a ni. Aizawl khawpui hian ṭhál lai a ni emaw, fûr lai pawh ni se, MNF sorkar chhung hian tui harsatna nasa takin a tâwk chho reng a, sorkar hmasaa harsatna lian awm ngai lo kha tunah chuan tui sem thlengin a mumal thei lo," an ti.

Aizawl khawpuiin tui harsatna a tawh apiangin PHE-in chhuanlamah - power supply mumal lo, ruahtui tlak tlem vang, khawl chhiat vang tihte leh a dangte an nei ṭhin tih sawiin MPYCC chuan, "Aizawl khawpuiin tui harsatna a tâwk leh ta hi chhuanlam siam tawh loa rang taka i chinfel ngei kan phût tlat a ni," an ti a; mipui harsatna au aw chháng thei lo khawpa PHE a enkawl zo lo a nih chuan, PHE chu mi dang kuta dah turin an phût bawk.

Congress ṭhalaite chuan, Aizawl New Market main building, July 2020-a ṭhiah tawh, kum hnih a pumhlûm hnu pawha a satu tur zawnna tender pawh chhuah theih a la ni lo chu veiawm an tih thu an tarlang bawk a ni.