Ni 115 hnua positivity rate hniam ber ṭum

September 28, Nilaini khan Mizoramah Covid-19 vei mi pasarih hmuh chhuah a ni a, positivity rate 4.10% niin, ni 115 hnua positivity rate a hniam ber ṭum a ni. Nimin khan hripui vei dam tawh mi 25 chhuahtir an ni a, hripui vei thi an awm lo.

Nilainia Covid-19 positive hmuh thar mi pasarihte chu mipa pathum leh hmeichhia pali niin, rapid antigen test hmanga hmuh chhuah vek an ni a, khawl dang hmangin swab sample endik a ni lo. Swab sample 171 endik aṭanga positive hmuh zat pasarih chu 4.10% a ni.

September 28-a Covid-19 positivity rate 4.10% hi ni 115 hnua positivity rate a hniam ber ṭum a ni a; June 4, 2022 khan positivity rate 3.54% a lo ni tawh.

Nimin tlai dinhmun angin, Siaha leh Lawngtlai district-ah Covid-19 vei enkawl lai an awm tawh rih lo a; Champhai, Kolasib, Serchhip leh Hnahthial district-ah pawh mi 10 aia tlem vek an awm rih. Active case 10 aia tam awmna district panga a awm a, a tamna ber Aizawl district-ah mi 48 an awm a ni.

IDSP record angin, Mizoramah Covid-19 vei 2,38,403 hmuh chhuah a ni tawh a, mipa 1,11,061 leh hmeichhia 1,27,342 an ni a, mipa aiin hmeichhia 16,281-in an tam zawk. Nimin tlai dar 5 thleng khan mi 2,37,516 (99.63%) chhuahtir an ni tawh a, mi 723 (0.30%) thi tawhin, enkawl mek mi 164 (0.07%) an awm.