KHAWTHLIR

Thisen pe
Kolasib College NSS chuan nimin khan an college hall-ah thisen pek an huaihawt a, Kolasib District Hospital tan thisen unit 40 an pe a, petute mipa 22 leh hmeichhia 18 an ni.

Ran vulh inzirtir
Agriculture Technology Management Agency leh Animal Husbandary & Veterinary department chuan nimin khan Lunglei DVO conference hall-ah ran vulh dan ṭha leh ar vulh dan dik leh hlâwk zawk inzirtirna, Production Technology of Livestock and Poultry an buatsaih a, Lunglei district veterinary officer Dr Vanlalhruaia'n a hmanpui.

Licence nei loa silai siam phal lo
Serchhip district bawrhsap Nazuk Kumar chuan nimin khan thupek chhuahin, Serchhip district-a silai siamtu (gunsmith)-te chu licence nei loa silai siam/ khawih ṭhat hna thawk lo turin a hriattir a; tualchher silai siam chu dan phal loh a nih thu a tarlang. Kângmei lakah mipui vantlang him nan kâng ṭhelhna atana hman theih tur kawl reng turin silai siamtute a hriattir bawk.

Science congress
Samagra Shiksha leh Science Teachers Association of Mizoram ten Khawzawl Zaingen YMA Hall-a ni hnih awh 30th Children’s Science Congress, 2022 an buatsaih chu nimin khan zawh a ni. Science Congress-ah hian junior category-ah sikul 17 leh senior category-ah sikul pakua an tel a, lawmman chi hrang hrang sem a ni.

Champhaiah zirho
LESDE department, Central YMA leh Common Service Centre-te chuan nimin khan Champhai Kahrawt community hall-ah PM-SYM, NPS-Traders leh e-SHRAM Portal chungchang inzirtirna leh puanzarna an buatsaih a, Champhaia YMA branch tin aiawh leh CSC aiawhte an tel.

SVEEP Quiz
Khawzawl District Election Office leh Khawzawl College Electoral Literacy Club-te chuan nimin khan Khawzawl College multipurpose hall-ah Systematic Voters' Education and Electoral Participation Quiz Competition an buatsaih a, DEO CC Lalchhuangkima, district bawrhsap-in a hawng.