Cyber crime case 85 ziak lut tawh CID-in social media-a admin-te an hria

Mizoram police chuan kum 2009 aṭanga kumin August thla tawp thleng khan cyber crime kaihhnawihah thubuai 85 an ziak lut tawh a, kumin bikah pariat an ziak lut tawh. CID (Crime) hotute chuan, social media-a page ṭhenkhat khawihtu zinga ṭhenkhat chu an nihna an hriat tawh thu an sawi.

Mizoram police-a CID (Crime)-in an chhinchhiah danin, CID (Crime) hian cyber crime kaihhnawihah hian kum 2009-ah thubuai an ziak lut ṭan a; case ziah luh ṭan aṭanga thubuai ziah luh tam ber kum chu kum 2014 kha niin, thubuai 28 ziah luh a ni.

Kumin bikah chuan, cyber crime thubuai pariat ziah luh tawh a ni a; kumina thubuai ziah luh zinga a tam ber chu social media-a thu post kaihhnawiha police-in complaint an dawn aṭangin a nih thu CID (Crime) hotute chuan Vanglaini palai an hrilh.

CID (Crime) hotute chuan, social media-a thu post kaihhnawihah police-in complaint an dawn tam thu sawiin, "Complaint zawng zawng hi register chi a ni lo a, tam tak chu a tuartu tana huatthlala tak, case ziah luh hleih theih si lohte a ni," an ti a; kuminah hian Aizawla police station paliah cyber crime kaihhnawih complaint 100 vel a luh tawh thu an sawi.

CID hotute chuan, Face­book group-a a buai­puitu bik (administra­tor)-te chu koin, hmaichhanah an tih tur leh tih loh tur te, an mawhphurhnate an hrilh tawh thu te, vaukhânna hriattirna lehkha an thawn tawh thute an sawi a, "Danin freedom of speech min pek rual hian, mi dang pawi khawihna leh tibuaitu a nih chuan dan vekin a khap a ni," an ti.

Zawhna chhangin CID hotute chuan, social media, Facebook-a page leh group ṭhenkhat, administrator nihna lang thei lote leh Instagram-a account, mimal hming langa khawih ni lotea administrator-te chu an hriat tawh thu an sawi rualin, an la hriat kim vek loh thu an sawi a; administrator ṭhenkhatte internet protocol (IP) address hmuh chhuah mai harsa deuhte a awm tih an sawi.

IP address hmuh/chhui chhuah mai harsa deuhte chu internet service provider zinga private company hmangtute an nih thu sawiin CID (Crime) hotute chuan, "Chhui chhuah mai a harsat chhan chu Telecom Regulatory Authority of India (TRAI) aṭanga phalna (license/permit) nei lote aṭanga internet late an nih vang a ni," an ti.

CID (Crime) hotute chuan, Mizorama private internet service provider company-te chu TRAI aṭanga permit/license nei lo deuh vek an nih thu sawiin "TRAI aṭanga phalna mumal tak la tura hriattirna kan pe a, company hotute pawh kan la ko khawm dawn a ni," an ti a; TRAI aṭanga license/permit nei lote tan internet service pek chhuah a remchan loh thu an sawi.

Cyber Crime Case
Kum Case
2009 2
2010 3
2011 5
2012 4
2013 9
2014 28
2015 10
2016 16
2017 8
Total 85