M/s Mizo Carbon hnenah MNF-in Pawisa an dil ṭhin - Zodintluanga

Minister Zodintluanga chuan, Mizo Carbon Product Ltd.-ah inhnam­hnawihna a neih loh thu a sawi nawn a, "Inhnam­hnawiha min puhtu MNF-te'n Mizo Carbon Product hnenah pawisa an dil zawk a ni," a ti.

Zodintluanga hian ni­min khan a pisaah Mizo Carbon Product chung­changah thehdarh­tute a kawm a, "He com­pany chungchangah hian sawi a awm fo ṭhin a, ka huan kawng a nih avangin mei­khu chhuakte ka hmu a, eng nge an tih dawn tihte ka en ve ṭhin," a ti a; chanchinbu lamin thil dik lo tak a awm tih an chhuah hnuah chu company chu Mizo Carbon Product tih a hriat ve chauh thu a sawi.

Mizo Carbon aṭanga hlâwkna hmua puhtu MNF-te'n Mizo Carbon company hotute sum an dil thu sawiin Zodin­tluanga chuan, "Company kalpui vanglai tak, kum 2013 khan MNF Trea­surer chuan company nei­tu Ravi Gulgulia hnen aṭanga party fund atana pawisa an dawn tawh vanga tibuai tawh lo tura tihna lehkha a ziak a ni," a ti.

Zawhna chhangin Zodintluanga chuan, MNF Treasurer chuan tu hnena pek tura lehkha chu ziak nge tih an hriat ve loh thu sawiin, "Pawisa an dil ṭhin a, an lo tibuai ṭhin a ni ang. Lehkha aṭang hian pawisa an la tih chu a chiang ngei," a ti. MNF Treasurer lehkha ziak nia a sawi chu thuthar thehdarhtute a sem a ni.

Zodintluanga chuan, Mizo Carbon company-ah inhnamhnawihna a nei lo tih chu a dinna a nih reng thu a sawi a, "He inpuhna hi a dik loh­zia leh ka dikzia tilang turin Court-ah ka kal a ni. Court rorelnaah sorkar a inrawlh thei lo a, dik taka rorel a ni ang a, hnehna kan chang ngei ang," a ti.