Oil palm lei loh vangin a ṭawih nasa

Serchhip district-a oil palm leitu 3F Agrotech Pvt.Ltd.-in kumin June thla aṭangin Serchhip district-ah oil palm an lei tawh loh avangin kumin fûr laia oil palm tharte chu hralh theih a ni lo a, oil palm rahte chu a ṭawih chhe nasa hle nia thu dawn a ni.

Thenzawl aṭanga thu dawn danin, Serchhip district-ah hian oil palm chíng chhungkaw ṭhahnem tak an awm a; chhungkaw 500 chuangte aṭanga 3F Agrotech-in kumin March, April leh May thla chhunga oil palm ton 65.046 an leina man chu tun thlengin an man an la pe lo a, oil palm man an bat zat chu Rs. 3,55,769 a tling.

Thenzawl Oil Palm Growers Association president C Lalzoliana chuan, 3F Agrotech hian kumin May thla hnuah oil palm an la lei leh lo tih a sawi a; fûr lai, oil palm an thar hlâwk ber hun laia oil palm an lei loh avangin oil palm rah a ṭawih chhe nasa a, an thawh rah chu engmah loah a chang niin a sawi.

Oil palm aṭangin hlâwkna an têl ṭan mek tura an inngaih laia harsatna an tâwk chu hrehawm an tih thu leh pawi an tih thu sawiin C Lalzoliana chuan, sorkara thuneitute'n hma lakpui thei se an duh thu a sawi a, "Hun rei tak kan lo enkawl tawh leh innghah nana kan lo hman tawhah kan beisei anga thil a thleng lo hi kan inchhîr ṭan mek a, mei alh en mai kan hmabak mek a ni," a ti.

C Lalzoliana sawi danin, Serchhip district-ah hian kum 2008 aṭangin company nen inremna neiin, oil palm an chín ṭan a, a chíngtu tam zawk chu NLUP hnuaia mite an ni.

Serchhhip district-a Oil Palm Zonal Committee hruaitute chhin­chhiah danin, tun dinhmunah Serchhip district-ah oil palm chíng chhungkua 528 an awm a, oil palm kûng 69,800 vel a awm mek. Thenzawl bikah chuan oil palm chîngtu chhungkua 120 vel an awm a ni.