CM-in HME directorate building a hawng

New Secretariat Com­plex-a Hospital & Medical Education (HME) direc­torate building sak thar chu nimin khan chief minister Lal Thanhawla'n a hawng a, Health Service directorate building sak hna thawh bul ṭan nan lung a phûm nghal.

Chief Minister chuan, tun hnai lawkah New Secretariat Complex chhungah sorkar building ṭha tak tak hawn a nih thu sawiin, "Office hawn tharte hi a hawn ní ang tluka vawnfai zel a nih sorkar chuan a beisei. Sorkar office-te hi vawnfai tur a nih bakah, a chhungah vaihlo zûk leh hmuam ti mi leh kuhva khâwr eite pawh an inthlahrunna turin zahawm taka enkawl ni se a ṭha hle ang," a ti.

Health minister Lal Thanzara pawhin thu sawiin, HME directorate building thar hawn a ni chu lawmawm a tih thu a sawi a, "HME department hi ṭhangduang tak a ni a, programme hrang hrang - non communicable diseases, trauma, disaster management, CEA, PNDT-te an awm tawh bakah, Medical Council leh Pharmacy Council-te pawh an accommodate a la ngai dawn a ni," a ti.

HME building hawn-na inkhawm hi Health secretary Lalrinliana Fanai-in a kaihruai a; tech­nical report-a a lan danin, building hi October 9, 2013-ah sak ṭan niin, March 28, 2017-ah sak zawh a ni a, cheng nuai 825.01 hmangin chhâwng ngaa sak a ni.