Tourism Convention Centre thar hawng

Berawtlanga Tourism department-in Convention Centre an sak thar chu September 27, Nilaini khan chief minister Lal Thanhawla'n a hawng a; World Tourism Day hman nghal a nih bakah, tourism tihhmasawn nan Tourism department leh Central YMA-in thawh dunna thuthlung an ziak.

World Tourism Day lawmna inkhawm hi Tourism minister John Rotluangliana'n a kaihruai a; Chief Minister chuan, Convention Centre thar hawn tak chu ṭangkai taka hman a nih a beisei thu a sawi.

CM Lal Thanhawla chuan, United Nations World Tourism Organization-in World Tourism Day thupui atana a thlan, 'Sustainable tourism: A tool for development' tih chu tourism tihhmasawn lama Mizoram hmachhawp leh mamawhna nen a inhmeh hlea a hriat thu sawiin, "Tunlaiah khawvelin hmasawnna a sawi reng rengin, ngêlnghet leh tlo hi a tel zel tawh a ni," a ti.

Tourism industry chu eizawnna ṭha a nih thu sawiin Lal Thanhawla chuan, "Mizoram pawh India hmarchhak state dang ang bawkin khualzin mite hîp theitu tur ram ngaw nalh leh sik leh sa nuam tak kan nei a ni," a ti. Khualzin mi tam zawk Mizorama an luh theihna turin ILP awlsam zawka neih theih nan online-a dil theih turin ruahman mek a nih thu a sawi bawk.

Tourism department leh CYMA-in 'Tourism awareness campaign' kalpuina atana thawh dunna thuthlung an ziahah hian Tourism department aiawhin Secretary leh Director leh, CYMA aiawhin CYMA President leh General Secretary ten hming an ziak a ni.

Tourism Convention Centre hi sorkar laipuia Ministry of Tourism aṭanga sum hmuh nuai 467.71 hmangin sak a ni a, chhâwng hnih a ni. Mi 230 lenna conference hall, greenroom, rest room, exhibition hall, VIP lounge, mi 44 lenna banquet hall, press conference hall leh thil dangte a awm.