Hmasawnna hna thawh hrang hrang thlirho

Aizawl District Development & Monitoring Committee nimin khan an chairman CL Ruala, Lok Sabha MP leh cochairman Ronald Sapa Tlau, Rajya Sabha MP hoin Secretariat conference hall-ah an ṭhukhawm a; sorkar laipui scheme hrang hrang hmanga hna thawhte an thlirho.

Meeting-a tarlan dan­in, Aizawl DRDA hnuai­ah MGNREGA job card nei mi 28,352 an awm a, hna thawh tur duan lâwk 2,223 zingah 1,366 (61%) an thawk tawh. Pradhan Mantri Awas Yojana - Gramin (PMAY-G) hnuaiah in 121 sak a ni a, sum awm zat aṭanga chhûtin 44% (nuai 69.95) hman ral tawh a ni.

Prime Minister Krishi Sinchayee Yojna (Watershed Development Component) hnuai­ah project 18 awm­in, cheng nuai 429.97 an hmang tawh a, project 18 chhungah hian ram hectare 69,366-a zauah hmalak a ni tawh.

PHE department kal­tlangin Swachh Bharat Mission (Gramin) hnuai­ah cheng nuai 155.11 hmangin khaw panga - Aibawk, Darlawn, Phullen, Thingsulthliah leh Tlangnuamah hmalak a ni a, sanitary complex 18 sak a ni.

Power & Electricity department-in Deen Dayal Upadhyaya Gram Jyoti Yojana kaltlang­in Aibawk, Phullen leh Thingsulthliah RD Block chhunga khaw pangaah êng an pe a, BPL chhung­kaw 67 hnenah êng pek a ni.

Urban Development & Poverty Alleviation department-in Swachh Bharat Mission (Urban) hnuaiah cheng nuai 789.20 sêngin mimal ek-in 1,440, van­tlang inthiarna pariat an siam a; páwna inthiar awm lohna, open defecation free (ODF)-ah khaw 11 chu puan a ni tawh. Pradhan Mantri Awas Yojana - Urban hnuaiah mi 300 hnenah in sak ṭanpuina pek a ni tawh bawk.