MSU hruaitute Chakma House-ah an kal

September 27, Nilaini khan Chawngte-ah Chakma-te'n Mizo Students' Union (MSU) hruaitute kut an thlak nia sawi a nih avangin Aizawla MSU hruaitute chu nimin khan Hunthar Venga Chakma House-ah an kal a; computer leh steel almirah ṭhenkhat an tichhia.

MSU thuchhuah tarlan danin, September 26, 2017 khan Chawngte Higher Secondary School sport lai chu Chak­ma ṭhalai ṭhenkhat­in an tibuai a; Chawngte MSU hruaitute'n thil awmzia hriat tum leh boruak ṭha awm theih nana hma an laknaah, Chakma ṭhalai 200 velin Chawngte MSU hruai­tu ṭhenkhat chu kut an thlak a ni.

MSU thuchhuah chuan, Chawngtea MSU hruaitute kutthlak an ni chu an dem tak zet tih tarlangin, "Hetiang thil kan ram ngeiah a thleng leh, a ram neitu Mizo zawkin kut kan tuar hi kan hrethiam lo tak zet a ni," an ti a; Mizo kut thlaktu Chakma-te chu a rang thei ang bera mana hrem tur leh Chakma kut tuar, Mizo ṭhalaite hnenah zangnadawmna pe turin Chakma Autonomous District Council an phût a ni.