ERC rawtna ṭhenkhat bawhzui mek a ni - School Education Minister

Hillsgate Weekly newspaper chuan nimin khan Aijal Club-ah 'Mizoram Education Watch & Envision' an buatsaih a; khuallian, School Education minister H Rohluna chuan, Mizoram Education Reform Commission (ERC) rawtna ṭhenkhat bawhzui mek a nih thu a sawi.

H Rohluna chuan, ram tan zirna a pawimawh thu sawiin, "Zirna tel lo chuan hmasawnna tak tak a awm thei lo. ERC rawtna siam tam zawk chu tihpuitlin a ni a, sikul ṭhenkhat, naupang neih mumal lohnate chu sâwi khawm niin, defunct school-te chu khâr a ni. Commission rawtna ṭhenkhat chu bawhzui mek a ni," a ti.

School Education Minister chuan, zirtirtute chu zirna kawnga mawhphurtu ber an nih thu sawiin, "Zirna hmasawnna atan zirtirtu quality ṭha a pawimawh. Zirtirtu lak zawng zawng MPSC kutah dah vek a ni," a ti a; sorkarin subject teacher neih a ngaih pawimawh thu a sawi.

Zirna lama tui lote pawhin eizawnna tling an neih theih nan vocational training leh skill development uar taka kalpui zel a nih thu sawiin Rohlun­a chuan, "Pianphunga rualbanlote'n zirna ṭha an neih theihna turin sorkar­in inclusive education-ah theih­tawpin hma a la ni," a ti.

Inkhawm hi Hillsgate editor C Lalhriatpuia'n a kaihruai a, mithiamte'n thupui hrang hrang an sawi a ni.