KHAWTHLIR
Pisa kai hun
GAD chuan thuchhuah siamin, Mizoram sorkar hnathawkte pisa kai hun tihdanglam a nih thu an tarlang. Mizoram leh hmarchhak state-a Mizoram House-a thawkte tan pisa kai hun chu November 1 - February 15 chhungin zing dar 9 aṭanga tlai dar 4 leh, February 16 - October 31 chhungin zing dar 9 aṭanga tlai dar 5 a ni. New Delhi, Kolkata, Mumbai leh Bengaluru-a Mizoram House-a thawkte tan pisa kai hun chu November 1 - February 15 chhungin zing dar 9:30 aṭanga tlai 4:30 leh February 16 - October 31 chhungin zing dar 9:30 aṭanga tlai dar 5:30 a ni ang.
Thisen pe
Saitual College NSS leh Red Ribbon Club-te chuan nimin khan an college-ah blood donation camp an huaihawt a, Aizawl Civil Hospital tan mipa 45 leh hmeichhia 17-te'n thisen unit 62 an pe.
'Mizo' magazine
Sap ṭawnga ziah chanchinbu (magazine) thar, 'Mizo' (Our heritage, our pride) tih chu nimin khan Aizawl Press Club-ah MJA president Vanlalrema Vantawl-in a tlangzarh. 'Mizo' hi lifestyle magazine a ni a, English-a tihchhuah tur niin, a chhuak hmasa ber tur chu vawiinah a chhuak dawn a; thla thum dana tihchhuah tura ruahman a ni.
Training khâr
New Economic Development Policy – Entrepreneur Development Scheme (NEDP-EDS) hnuaia September 4-28, 2017 chhunga Entrepreneurship Knowledge Centre (EKC), ZIDCO-a buatsaih, 'Entrepreneur Skill Development Programme on Construction Supervisor Course' chu nimin khan khâr a ni a, Planning Board vice chairman H Liansailova'n a hmanpui.
NLUP sem
Kolasib-a Agriculture department chuan nimin khan Kolasib leh Bairabi circle-a NLUP dawngtute hnenah ṭanpuina an sem a, bialtu MLA PC Zoram Sangliana'n a hmanpui. PC Zoram Sangliana chuan, mi tam takin NLUP chu sawisel ṭhin mah se, mi rinawm leh tumruhte'n an hlawhtlinpui thu a sawi. Ṭanpuina hi mi 202 hnenah Rs. 64,95,000 sem a ni.